KUCHING: Kampung Bako diatu angkat nyadi tekang intan berega Sarawak enggau pengulih besai nyadi palan dagang temuai betikas dunya, berekat penumbuh Taman Negara Bako, pesaka rampa menua ti diaku nyadi Taba Pesaka Asal Dunya.

Sapit Menteri Kuasa enggau Pemeruan Rampa Menua Sarawak, Datuk Dr. Hazland Abang Hipni madah, Taman Negara Bako ti kaya enggau biodiversiti sereta nyadi endur spesies nyelai baka kera proboscis ti ngembuan pematak besai ulih narit ati temuai ari serata dunya.

“Kampung Bako ukai semina endur nemuai tang mega tekang intan berega ti nganti ngambi dikemanah nyadi ikon dagang temuai gadung Sarawak.

“Kitai bisi aset asal ti chukup berega tang semua kitai meseti ngena enggau nyaga nya,” ku iya bejaku maya bejadika Bako Day 2025 kena Hari Enam.

Bako Day 2025 ngatur bemacham aktiviti komuniti enggau ekonomi lokal baka pekit nyumai, ngaga bungai, dam haji sereta pemandang ari agensi enggau gerempung ukai dikuasa perintah (NGO).

Penatai pengusung nyengkaum raban motosikal besai ari ‘2nd SARAWAK International Bike Gathering 2025’ mega ngemujur promosyen dagang temuai genturung tu.

Ba konteks pemansang, Datuk Dr. Hazland ke mega Kaban Kunsil Nengeri (ADUN) Demak Laut madah, pengulih besai Kampung Bako mega disukung nengah projek infrastruktur besai baka penyangkai kapal tasik dalam enggau padang bilun antarabansa di Tanjong Embang ti disadang nyadi penyungkak besai ekonomi dia.

“Nengah pengaya rampa menua enggau pengeran perintah nengeri, Kampung Bako diatu ba pelasar ti engkeman nyadi palan eko dagang temuai tebilang di rantau tu,” terang iya baru. – EDISI UKAS