KUCHING: Stesyen radio lokal dipinta ransing agi bejalaika tanggungpengawa nyadi penyambung entara perintah enggau rayat kelebih agi ngenataika pesan narak pengeleda bekaul isu kritikal ti meri pangka terus ngagai komuniti kelebih agi ba sitak menua pesisir.
Sapit Menteri di Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, radio mengkang nyadi medium komunikasyen pemadu semak enggau komuniti menua pesisir lalu bisi pengulih besai nyadi pelasar ngerembai penerang ti nemban.
“Bala DJ meseti ngenang pengandal enggau pengelebih sida ngagai bala peninga dikena ngenataika pesan beguna chara konsisten belama,” ku iya maya bejaku ba Pengawa Ngelanchar Muzik Video ‘Ari-Ari Gawai’ dikeluar Kupikupi FM Sarawak di TEGAS Digital Village ditu, kena Hari Enam.
Iya mega udah ngenataika tiga isu besai ti begunaka perati enggau atur lengkas iya nya bekaul kes nipu online (scam), penyalah ngenyai infrastruktur mensia mayuh sereta judi online.
“Mensia mayuh meseti seruran dikeingat ngambi bejimat nerima kangau telefon tauka pesan ti nyelai laban mayuh udah kena tipu online nyentuk lenyau duit simpan sida,” ku iya nyemetak.
Ngenang silik, Datuk Abdullah madah, isu ngenyai infrastruktur mensia mayuh kelebih agi mungkur enchuri kabel komunikasyen ukai semina ngeruga sistem telekomunikasyen tang ngasuh pengerugi bejuta ringgit sereta ngeruga servis ngagai mensia mayuh.
“Pia mega, judi online mega majak ngirauka ati. Diatu bisi ‘kasino mit’ online ti ngemuntang akses ngagai aktiviti ti salah tu.
“Engka kita ulih bekerejasama enggau raban bekuasa laban sida bisi data enggau penerang ngambi dikunsi dikena nagang penyalah tu,” terang iya.
Nya kebuah, Datuk Abdullah madah ke pengeran UKAS bekerejasama rat enggau stesyen radio ngambi ngenatai penerang ngagai rayat.
Ku iya, UKAS sedia nyendia data sereta penerang ti relevan nengah rentayan kerejasama begulai enggau pegawai UKAS ti dianjung ba genap pelilih enggau bagi menua di selampur Sarawak.
Ngenang pasal muzik video ‘Ari-Ari Gawai’, ku Datuk Abdullah, karya nya ukai semina ngayanka elemen asal baka tanda enggau pekayan asal komuniti Dayak tang mega ditambah enggau elemen muzik moden dikena matak minat rebak biak.
Berebak enggau nya, iya ngelalau raban seniman enggau pemekuh sedia terus bejalaika pengawa ti signifikan ngenataika pesan ti besai reti nengah karya seni ti kreatif.
Sama datai ba pengawa nya, Menijar Kupikupi FM Sarawak, Gideon Jute; Tuai Pegawai Eksekutif AZAM Sarawak, Ali Suhaili; Penanyi lagu 'Ari-Ari Gawai' Rowena Jala enggau Hairee Francis sereta staf KupiKupifm. -EDISI UKAS
