MIRI: Kaunsil Mengeri Miri (MBM) sehari tu udah ngerikod siti agi sejarah lebuh pengawa Nyain Suwa Begunan Lama MBM enggau kompeni Imasa Dinasti Sdn. Bhd., sereta siti Sempekat Pemereti Ati (MoU) entara Imasa Dinasti enggau D’Sunlit Group ari Brunei Darussalam, ti diatur ba Dewan Bandaraya Miri kena Hari Empat tu tadi.
Pengawa nya udah dipenyadika Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Prof Dr Sim Kui Hian ti datai nyadi temuai dipebasa sereta saksi besai ungkup kededua pengawa nyain sempekat nya.
Sama datai, Konsul Jeneral Republik Rakyat China, Xing Wei Ping; Sapit Menteri Dagang Temuai, Industri Kreatif enggau Seni Pemerindang Sarawak, Dato Sebastian Ting Chiew Yew; Datuk Bandar Miri, Adam Yii Siew Sang; sereta raban pengari ari agensi perintah lokal enggau menua luar.
Pengawa nyain suwa ti ditanggam ngaul ngaduka baru begunan pesaka diempu Dewan Bandaraya Miri diangkat nyadi Institut Perubat Integratif Fudan, asil kerejasama strategik entara Imasa Dinasti Sdn. Bhd. enggau Fudan University ari China, siti ari universiti pemadu nyulut ba Asia.
Ba maya ti sama, pengawa nyain MoU entara Imasa Dinasti enggau D’Sunlit Group ari Brunei kelai ngepun kerejasama serantau ba pengawa pemansang, meranak puku sereta pansik, lalu ngenegap kaul diplomatik enggau ekonomi entara Sarawak enggau menua sepiak nya.
Seraya nya, Datuk Amar Profesor Dr Sim lebuh bejaku madah ke pengawa nyain sempekat nya nyadi pengepun siti inisiatif besai ke deka ngubah landskap pelajar enggau servis pengerai di Sarawak.
Iya nerang pengawa numbuhka institut tu entara pengawa besai reti dikena ngamatka aspirasyen perintah nengeri ti deka ngulih autonomi ba pekara pengerai enggau pelajar seriris Semangat Sempekat Malaysia 1963 (MA63).
“Projek tu ngayanka pengeransing Perintah Sarawak ba pemansang sektor perubat integratif lalu ngerandang jalai ngagai pengawa numbuh sekula perubat, hospital pengajar sereta palan pansik betikas antarabansa ba nengeri tu,” ku iya.
Iya mega nyemetak madah ke Fudan University siti ari dua institusi pelajar tinggi ari China ti diaku Kaunsil Perubat Malaysia, ngasuh projek tu engkeman endar dikena ngemansangka modal mensia perubat Sarawak.
Pengawa nyain sempekat enggau MoU tu mega dikemata nyadi kelai ngidupka baru begunan sejarah ba tetengah mengeri Miri, ke diatu diadu baru nyadi kelai pemansang.-EDISI UKAS
