KUCHING: Perintah Sarawak benung ngatur tetiap begunan ba kandang menua tu meseti bisi ‘Defibrilator Luaran Automatik’ (AED), dudi hari.

Sapit Premier Sarawak, Datuk Amar Profesor Dr Sim Kui Hian madah, raban perintah nengah Opis Menteri Pengerai Mensia Mayuh, Pengawa Berumah enggau Perintah Lokal Sarawak (MPHLG) deka ngatur randau enggau Luyar Besai Sarawak, Dato Sri Saferi Ali ngambi mantaika ‘Ordinan Bangunan’ ungkup neritka atur nya.

“Aku udah minta Luyar Besai Sarawak berati sekali ke kitai ulih mai pekara tu nengah Ordinan Bangunan tauka enda, ngambi ba Sarawak, semua palan mensia mayuh meseti disikap AED ngena atur mandatori.

“Kebuah pia laban penyakit lumur satu kitai iya nya penyakit tungkul atau, lalu majak mayuh orang enda memukai rebah, nya alai kitai deka pekara tu patut diputar nengah undang-undang.

“Dikena bejuraika siti undang-undang ari baruh Ordinan Bangunan, aku begunaka Luyar Besai Nengeri laban aku enda ulih sengapa bejuraika nya ba Parlimen lalu aku empu madah laban ngira bisi prosedur enggau proses ke patut dititih,” ku iya.
Iya madah munyi nya lebuh bejaku ba Pengawa Nyerah Ambulans Baru ungkup PBSM Malaysia Pampang Sarawak, ditu, kena Hari Empat.

Datuk Amar Profesor Dr Sim nambah, bala opis iya benung berunding ngaduka AED ba begunan enggi Perintah Sarawak dulu, sebedau diadu ba begunan mensia mayuh pengudah Ordinan Bangunan nya dikemendarka ila.
Ba pengawa nya mega, iya bisi ngemataka pengawa nyua chek penyampau RM43,270.05 ari Direktor Atur Thian Lee Marketing Sdn Bhd, Joseph Ho ngagai bala PBSM Malaysia Pampang Sarawak. -EDISI UKAS