SELANGAU: Perintah Sarawak majak mandangka penyiru sida ba pengawa ngintu pengelantang rayat lebuh udah ngungkup bemacham bantu serimbai hari besai, kelebih agi ngagai raban ke begunaka bantu.

Ku Sapit Menteri Pemansang Pengelantang Komuniti Sarawak, Datuk Mohammad Razi Sitam, Opis Pengintu Pengelantang Mensia Mayuh Sarawak (JKMS) udah meri bantu penyampau RM98,816,400 ungkup 55,184 penerima ba selampur kandang menua tu ari Januari nyentuk April taun tu.

Bantu nya ngaul bemacham skim, nyengkaum Bantu Orang Tuai (BWE), Bantu Nembiak Mit (BKK), Bantu Am, Elaun Pengereja OKU (EPOKU), Bantu Nyaga OKU Enda Regas/Orang Sakit Raya (BPT), Bantu OKU Enda Ulih Gawa (BTB), Bantu Anak Dijaga (BAP) sereta Bantu Raban Nembiak (BBB).

“Bantu tu ukai semina ngelempungka tating belanja penerima aja, tang nyadi sukung moral dikena nerus ke pengidup sida enggau ati ke andal agi,” ku iya lebuh bejaku ba program Sejambak Kasih Gawai ke diatur ba Selangau kena Hari Empat tu tadi.

Nerang silik senentang program nya, iya madah ke bisi 24,101 penerima selampur Sarawak deka nerima pemaik, mungkur 13 pelilih menua nyengkaum Kapit (2,878), Sibu (2,871), Sri Aman (4,359), enggau Kuching (2,896).

Ba baruh program Sejambak Kasih Gawai, genap penerima deka nerima bantu belanja RM100 enggau hamper berega RM80, siti inisiatif ke udah dipejalai lebih dua puluh taun dikena nentuka nadai raban dikelaung maya ngintu hari besai.

“Batang tuju bantu tu dikena sida nyendiaka diri ngintu hari besai lalu ba maya ti sama ngerapitka kaul entara raban opis enggau rayat,” ku iya nambah ke jaku.

Datuk Mohammad Razi bela madah, bantu tu mandangka pengeransing perintah nengeri ba nentuka tiap iku rayat diberi perati ti patut.

Sama datai, Kaban Kunsil nengeri (ADUN) Tamin, Ir Christopher Gira Sambang; Pegawai Pelilih Selangau, Yalin Asan; pengari Direktor Pengintu Pengelantang Nengeri, Noren Chunggat; enggau pengari Residen Bagi Menua Sibu Mecgyver Boi. -EDISI UKAS