SELANGAU: Peranak Rumah Lumpoh, Sepudun diatu berasai lantang ati ngintu Gawai Dayak pengudah jalai besai ke rumah panjai nya mujur diseleti ari jalai batu ngagai jalai semin nengah Program Transformasyen Menua Pesisir (RTP) DUN Tamin.
Projek nya beungkus RM100,000 ti udah digaga Opis Kereja Raya (JKR) Sarawak berengkah 26 Disember 2024 lalu tembu abis nitih ke taga kena 25 Mac 2025.

Pengawa nyua projek udah diatur kena Hari Tiga tu tadi enggau penatai pengari Palan Servis DUN Tamin ngari ke Kaban Kunsil Nengeri (ADUN) Tamin, Ir. Christopher Gira Sambang begulai enggau bala JKR Bagi Menua Sibu.

Nitih ku Ir. Christopher, projek tu dikearap ulih meri pemaik ungkup komuniti Rumah Lumpoh, kelebih agi maya Hari Besai, ke alai beguna ke endur engkah perengka pengangkut enggau jalai ke meruan ditengah.

“Kitai nemu jalai tu ukai semina nyamai ditengah ninting hari, tang mega besai reti maya Hari Besai baka Gawai Dayak lebuh mayuh bala anak pulai ke menua,” ku penerang ti dikenataika pengari iya, Hari Tiga tu tadi.

Sama datai ba pengawa nya, Penulung Injinir Awam JKR Bagi Menua Sibu, Rashidah; Pegawai Palan Servis ADUN Tamin, Cr. Ajan Dau; Tuai Rumah Lumpoh sereta pengari kontraktor ke ngesan tanggungpengawa bejalaika projek.-EDISI UKAS