PARIS: Deligit Sarawak ti betuai ke Sapit Premier Sarawak, Datuk Amar Awang Tengah Ali Hasan udah ngatur randau enggau Ardian, siti kompeni meranak puku peribit global tebilang dikena ngemansang industri semikonduktor enggau inisiatif hidrogen gadung Sarawak.

Ba pengawa betemu enggau raban Ardian’s Hy24, deligit Sarawak udah mantaika pengelebih nengeri nya ba kuasa ulih dikena baru, kelebih agi pengulih kapasiti hidroelektrik penyampau 20GW sereta ekosistem semikonduktor ke majak ngerembai, disukung inisiatif nengeri enggau kerejasama CSA Catapult di United Kingdom.

“Penau Ardian ngerembai ke pengawa semikonduktor enggau infrastruktur hidrogen beresi setipak enggau visyen Sarawak dikena nempa pelasar industri ke bemacham sereta berega,” ku iya nengah siti penerang media kena Hari Tiga.

Asil ari pengawa betemu nya nyengkaum pengeransing Ardian bejalaika pansik ti patut ba pengawa semikonduktor ke benung ngerembai ba Sarawak sereta aktiviti hidrogen gadung, enggau pengulih dikena ngelala kompeni ke bisi pengulih nangkup pengawa meranak puku nengah program nangkan begulai enggau InvestSarawak.

Kededua bela berandauka pemansang ekosistem sereta peluang bukai ungkup dagang mit enggau jelan pemesai (PKS) Sarawak.

Sama datai, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh; Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED), Dato Sri Naroden Majais; Sekretari Mendam MINTRED, Dzulkornain Masron; Sekretari Mendam, Opis Menteri Pengeraja Asal enggau Pemansang Mengeri Sarawak Datu Abdullah Julaihi; sereta pengari deligit Sarawak ke bukai. -EDISI UKAS