PARIS: Sarawak terus nyingkang ba transformasyen digital enggau pemansang industri teknologi tinggi lebuh deligit perintah nengeri ti betuai ka Sapit Premier, Datuk Amar Awang serikat Ali Hasan ngatur pengawa betemu strategik enggau kompeni teknologi global, Dassault Systèmes, ba indu opis iya ba Vélizy-Villacoublay ditu, Hari Tiga.
Pengawa betemu nya fokus ngagai pengulih kerejasama ba pemansang kilang pemadu maju, transformasyen digital, enggau pemansang mengeri pintar ke alai deligit Sarawak diberi penerang senentang pelasar 3DEXPERIENCE enggi Dassault Systèmes ti nyendiaka pengulih ba langkar 3D, simulasi, atur pemansang produk, sereta perambu mengeri moden.
Ba program randau, kededua bela ngelala peluang ngenegap industri lokal nengah konsep Industri 4.0, pemansang sektor aeroangkasa, enggau infrastruktur moden nengah teknologi digital nyengkaum inisiatif latih enggau pemansang sereta penumbuh siti Palan Penyulut di Sarawak.
Datuk Amar Awang Tengah nengah siti penerang media madah, Dassault Systèmes nya bakih strategik ngangkatka Sarawak hab teknologi tinggi.
“Pengulih sida ba inovasyen digital sigi setipak enggau tunga kuing pemansang Sarawak,” ku iya.
Berebak enggau nya, InvestSarawak mujur ngatur kerejasama rat enggau Dassault Systèmes numbuhka siti Makmal Inovasyen ke disadang ngesan tanggungpengawa besai matih injinir ba langkar 3D enggau simulasi, kelimpah nambah pengulih pengawa ngaga sereta mutarka mengeri pintar.
Udah tu, randau teknikal deka diatur enda lama da, kelimpah langgur Dassault Systèmes nimbal nemuai ke Sarawak ngambi berandau lenak agi pasal kerejasama ke diperambu.
Sama datai, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh; Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED), Dato Sri Naroden Majais; Sekretari Mendam MINTRED, Dzulkornain Masron; Sekretari Mendam, Opis Menteri Pengeraja Asal enggau Pemansang Mengeri Sarawak Datu Abdullah Julaihi; sereta raban pengari deligit Sarawak ke bukai. -EDISI UKAS
