TEBEDU: Bisi 26 sekula ba sitak Kunsil Nengeri (DUN) Tebedu nerima agih belanja penyampau RM316,090 ari Kaban Kunsil Nengeri (ADUN) Tebedu, Dr. Simon Sinang Bada ba sebengkah pengawa ke diatur ba Palan Servis DUN N.21 Tebedu, kena Hari Dua tu tadi.

Belanja nya diagih nengah Pengawa Nyua Chek Projek Khas Renggat 1/2025 ngagai Gerempung Apai Indai enggau Pengajar (PIBG) ungkup tiga sekula sekondari enggau 23 sekula primari.

Ku Dr. Simon, agih belanja nya dikena nyaup program pelajar enggau aktiviti sekula, kelebih agi ngemanah pemutus peresa nembiak enggau tikas sekula.

“Aku udah ngungkupka 20 peratus ari RM2 juta setaun belanja khas Palan Servis dikena nyaup agenda pelajar menua,” ku iya.

Dr. Simon mega madah, pelajar kunchi ngubah pemansang dudi hari enggau tikas pengidup ruang bilik sereta komuniti.

“Gaya pengidup siku-siku mensia enggau ruang bilik sekali ke nya mansang tauka enda sigi bepanggai ngagai pemujur pelajar bala anak," ku iya nyemetak.

Iya mega ngingatka PIBG enggau kelab ngambi ke ngerikod enggau betul tiap kali bekenaka belanja ngambi ke muntang meresa tauka ngaga audit dudi hari.

Bela nerima agih belanja iya nya Komiti Pemansang enggau Pengelikun Genturung Pendiau (JKKK). -EDISI UKAS