MIRI: Program penemuai gawa ngagai semilan Agensi Pemansang Kandang Menua (RDA) Sarawak ditandu kena Hari Dua, ke Opis Agensi Pemansang Tanah Tinggi (HDA) ditu.

Tu palan kedua nangkan Lawas lalu deka diatur berengkah ari 5 ngagai 16 Mei 2025.

Penemuai gawa nya betuai ke Sapit Menteri ba Opis Premier Sarawak (Pengatur Projek Ungkup Agensi Pemansang Kandang Menua, Dewan Bandaraya Kuching Utara enggau Pekara Islam), Datuk Dr. Abdul Rahman Junaidi.

Tuju penemuai nya dikena matau pejalai projek pemansang ke benung digaga nengah RDA kelimpah ngenegap kaul kereja entara opis menteri, agensi pengatur enggau pematau projek.

Ba penerang ke digulu 24 penyereta nyengkaum pengari agensi teknikal enggau administrasyen pelilih, iya nyemetak madah ke pemesai guna nyeraris entara semua agensi bekaul dikena nentuka projek mujur dipejalai nitih ke timpuh.

Nitih ku iya, siti Komiti Khas deka ditumbuh ti betuai ke iya empu dikena nyeraris pekara pejalai pengawa sereta ngerumban pengawa nangkan ke nya.

Komiti khas nya deka ngaul semua RDA sereta agensi perintah besai baka EPU, SIMU enggau opis menteri bekaul.

Entara ke bisi datai ba pengawa nya, Direktor Kandang Menua HDA, Juan Ubit, Direktor SIMU, Sapiah Daud, pengari Direktor EPU, Florida Gala James Mijien sereta pengari ari Opis Residen enggau Opis Pelilih Bagi Menua Miri (Telang Usan, Marudi enggau Beluru).-EDISI UKAS