SELANGAU: Perintah Sarawak nengah inisiatif Agensi Pemansang Menua Pesisir enggau Kandang Tengah (MIRRDA) nyelinting genap ruang bilik bulih penatai pemisi abis nadai RM8,000 sebulan nengah pengawa bejalaika projek nanam sawit ti mungkur sitak Parlimen Kanowit enggau Selangau.

Kaban Kunsil Nengeri (ADUN) Tamin, Ir Christopher Gira Sambang madah, projek nya ngaul lebih 6,000 ruang bilik lalu deka dipejalai nengah kerejasama Opis Betanam Betupi Pelilih ti nyadi agensi pengatur.

“MIRRDA nyelinting genap ruang bilik ulih nanam entara dua ngagai lima hektar sawit ti deka dijaga raban agensi ba timpuh tiga taun keterubah.

“Pengudah sawit berengkah mansutka asil, pengawa nyaga deka diserah ngagai pengempu tanah nya empu,” ku iya maya bejadika Pengerami Negap Komuniti diatur Kelab Lumba Sungai Wong di Rumah Empera, Sungai Wong, Ulu Mukah, kena Hari Enam.

Ku iya, inisiatif tu sebagi ari pengawa perintah nengeri negap ekonomi menua pesisir sereta nyamin pengelantang idup rayat ba menua ulu.

Iya mega meransang nembiak abis Sijil Pelajaran Malaysia (SPM) nampung pelajar ngagai renggat tinggi agi berindik ari Perintah Sarawak diatu nyendiaka pelajar pechuma ngagai nembiak ti nampung pelajar renggat Diploma enggau Degree di universiti dalam nengeri tu.

Kelai sukung ngagai pemansang komuniti menua, iya mega ngemendar agih belanja Projek Mit Pemansang Menua Pesisir (MRP) penyampau RM39,000 ngagai Rumah Empera enggau RM10,000 ngagai Kelab Lumba Sungai Wong. – EDISI UKAS