BINTULU: Pasar Gawai Dayak Bintulu 2025 ti diatur di Balai Suarah Bintulu kena Hari Enam ukai semina pengawa bejual tang nyeremin semangat begulai enggau nambah ekonomi komuniti Dayak, besuluka jaku ‘Segulai Sejalai Bedagang’.
Pengawa nya udah dipenyadi Ahli Dewan Negara, Senator Rita Sarimah Patrick Insol ba mua lebih 15 serakup Dayak ti begulai nyadi komiti pengatur.
Bejaku ba pengawa nya, Senator Rita nyemetak madah ke pemesai guna Pasar Gawai Dayak nyadi nalan pemungkal ngagai komuniti Dayak kelebih agi raban indu ngaul diri ba dunya dagang mit enggau jelan pemesai.
“Aku berati ke kualiti produk lokal baka pekayan ngena motif etnik, aksesori manik sereta pemakai asal bisi pengulih dikomersial, ukai semina ba pasar tang mega ba palan besai bebelika barang,” ku iya seraya ngansak raban indu nyadi pemekal ti ransing ngelaku produk belabuh taun baru.
Iya mega ngelalau promosyen program tu patut suah agi diatur enggau dibantai nengah pelasar media sosial baka Facebook enggau Tiktok dikena matak mayuh agi pengusung enggau meri pengeleda pasal pesaka budaya Dayak.
Entara perambu bukai ti dibantai nyengkaum ngerembaika atur aktiviti main asal baka main asal dikena mekuh identiti etnik sereta ngangkatka pasar tu nyadi nalan dagang temuai budaya.
Ba program nya, Senator Rita mega nyuaka pemeri RM15,000 ngagai Komiti Pengatur kelai sukung ngagai program nya.
Pasar Gawai Dayak 2025 nyadi lambang ngempung komuniti, asil kerejasama 15 serakup.
Tuai Komiti Ngatur Pasar Gawai Dayak taun tu iya nya Serakup Pemansang Dayak (BANGUN) begulai enggau 14 serakup bukai iya nya; Sarawak Dayak Iban Asociation (SADIA), Dayak Bidayuh National Association (DBNA), Sarakup Indu Dayak Sarawak (SIDS), Orang Ulu National Association (OUNA), Terabai Menua (TM), Dayak Bukit Kelingkang (DBK), Serakup Pengemeran Seni Tanda Pelilih Bintulu (PEMENTAS), Serakup Bisaya Sarawak (PBS), Serakup Dayak Sarawak (PEDAS), Serakup Peminat Main Asal Iban (PEMANIS), Serakup Komuniti Etnik Kajang Sarawak (PKEKS), Serakup Kayan Sarawak (PKS), Serakup Kuntau Kipas Dam Dam Spring Bintulu (PKKDDSB) enggau Serakup Kenyah Badeng Sarawak (KEBANA).-EDISI UKAS
