LONDON: Program Lan Berambeh Anak Sarawak 2025, United Kingdom (UK) Edition ti keterubah diatur di London deka nyadi program ninting taun berindik ari pemanah timbal ari komuniti nembiak Sarawak di menua luar.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah ke pekara nya maya bejaku ba Pengerami Makai Lemai Anak Sarawak serimbai program nya kena malam Hari Enam jam Malaysia.

Ku iya, venue ngatur program Lan Berambeh Anak Sarawak 2025 UK Edition ungkup taun baru iya nya di mengeri Manchester.

“Pengudah berandau enggau bakih Menteri Kabinet Sarawak ditu, kami udah ngaga pemutus program Lan Berambeh Anak Sarawak 2025 UK Edition deka nyadi program ninting taun belabuh taun baru,” terang iya.

Berita nya nunjukka pengeran Perintah Sarawak nampung inisiatif tu nyadi pelasar negap pemereti ati, rentayan profesional enggau bekunsi penemu entara nembiak Sarawak di menua luar.

Pengawa ngatur program baka tu ukai semina mekuh kaul entara perintah nengeri enggau peranak Tanah Kenyalang di menua luar tang mega meri peluang berandau pasal pemansang Sarawak ti inklusif enggau progresif.

Berebak enggau nya, Pengerami Makai Lemai Anak Sarawak udah richah diatur enggau chura budaya Sarawak.

Pengerami nya mujur ngempuru beratus anak Sarawak nyengkaum nembiak ti nampung pelajar di UK, Perancis enggau Jerman enggau penuh richah sereta temegah ngagai identiti nengeri asal sida.

Sama datai ba pengerami nya, bala Sapit Premier Sarawak, Datuk Amar Awang Tengah Ali Hasan enggau Datuk Amar Prof Dr Sim Kui Hian, Sekretari Perintah Sarawak, Datuk Amar Mohamad Abu Bakar Marzuki, bala Sapit Menteri Sarawak sereta temuai dipebasa bukai. -EDISI UKAS