BARIO: Siti pengawa ti besai reti udah diatur di Pelilih Mit Bario kena Hari Enam dikena ngenang jasa bala veteran sereta sida bujang berani komuniti Kelabit sebilik ti kala begulai enggau raban khas Z-Semut dikena ngelaban penyelawai Jipun lebuh Perang Dunya Kedua.

Pengawa Nyuaka Token Ngenang Jasa nya udah diatur Gerempung RURUM Kelabit Sarawak enggau kerejasama Palan Servis N78 Mulu, enggau dipenyadi Sapit Menteri di Opis Premier Sarawak (Pengereja Kasar, Imigresyen enggau Patau Projek) ke mega Kaban Kunsil Nengeri (ADUN) Mulu, Datuk Gerawat Gala.

Datuk Gerawat madah ke Z-Semut, siti unit khas di baruh Z Force dipegai raban Sekutu udah bejalaika operasyen resia di ulu Sarawak ba taun 1945 nengah sukung penuh komuniti lokal kelebih agi komuniti Kelabit.

“Pemerani enggau kerejasama rat entara raban khas tu enggau komuniti lokal nyadi pugu pemujur ngelepas kendang menua ari pegai penyelawai Jipun,” ku iya.

Ngenang silik, Datuk Gerawat madah ke pemujur operasyen nya ukai semina ari sukut soldadu tang mai ubah nyengenda ba landskap sosial enggau budaya komuniti Kelabit.

“Interaksyen enggau dunya luar udah muka peluang baru enggau meri inspirasyen ngagai rebak biak Kelabit ngambi gawa dalam Raban Soldadu Malaysia enggau Polis DiRaja Malaysia pengudah perang,” terang iya.

Pengerami nya ukai semina ngenang jasa tang mega nyadi pelasar pelajar sejarah ngagai rebak biak ngambi ngenang jasa enggau mereti ke tanggungpengawa besai komuniti lokal enggau ngetanka menua.

Sama datai ba pengawa nya, Kaban Majlis Bandaraya Miri, Kaunselor Lilla Raja sereta komuniti lokal.-EDISI UKAS