KUCHING: Yang Di-Pertua Negeri Sarawak, Tun Pehin Sri Dr Wan Junaidi Tuanku Jaafar ngasaika pemidang penulis enggau pemberita veteran, James Ritchie nya siti pengelenyau ti chukup besai ba dunya pemberita.

Ba sebengkah penerang ari Astana Negeri Sarawak, iya sereta bini, Toh Puan Datuk Patinggi Fauziah Mohd. Sanusi meri penyinu ati ngagai sida niang James Ritchie sebilik.

Tun Pehin Sri Dr Wan Junaidi mega chukup sinu enggau tekenyit ngenang pemidang niang.

“Niang siku orang ti chukup dibasa ba dunya pemberita.

“Niang ukai semina siku pemberita ti regas gawa tang mega siku bakih ti seruran ngenang tiap kenang kami duai begulai,” ku iya.

Ba sebengkah penerang sebaka, Tun Pehin Sri Dr Wan Junaidi mega ngenang keterubah iya ngelala niang kenyau ari jeman sekula di Sekula Sekondari St Thomas Kuching, sereta peneleba gawa nyadi Aide De Camp (ADC) ngagai apai niang, Dato Sri John Ritchie ke mega Kepala Polis Sarawak keterubah ba taun 1968.

“Niang siku orang ti chukup manah ba mayuh sukut sereta seruran meri sukung, semangat enggau suah muji.

“Aku deka seruran ngenang niang nyadi siku bakih enggau bakih sama nulis sekeda bup ti diasil kami duai begulai,” terang iya.

Lebih ngenyinu ati, Tun Pehin Sri Dr Wan Junaidi mega madah ke iya enggau niang udah merambu betemu bulan Mei tu ngambi berandau pasal bup khas ti ditulis niang.

“Semua udah diperambu tang Tuhan lebih nemu. Kami nerima aja semua tu,” ku iya.

Enggau penuh penyinu, Pehin Sri Dr Wan Junaidi enggau Toh Puan Datuk Patinggi Fauziah besampika sida niang James Ritchie sebilik liat ati napi penguji besai tu. -EDISI UKAS