MIRI: Bisi 500 iku begelumu ba pelaman Dewan Bandaraya Miri, ngerichah Program Hari Nadai Perengka Pengangkut serimbai ngintu Genap Taun ke-20 Mengeri Miri, Hari Enam.

Program ti diatur Kaunsil Mengeri Miri (MBM) nya berengkah urung pukul 7.30 tumu pagi enggau mayuh macham aktiviti ke ngerindu ati ti ngembuan tuju narak gaya idup bepengerai sereta meransang semangat sayau ke rampa menua ngagai komuniti Miri.

Pengawa nya udah dipenyadi Datuk Bandar Mengeri Miri ke mega Kaban Kunsil Nengeri (ADUN) Pujut, Adam Yii Siew Sang.

Adam madah ke pengerami sekali tu chukup besejerah ke ukai semina nanda ke 20 taun pemansang Miri nyadi mengeri, tang mega negap pengeransing rayat enggau pemansang meruan setipak enggau Strategi Pemansang Pengudah COVID-19 (PCDS) 2030.

“Pengerami tu mandang ke semangat kitai nempa Miri nyadi mengeri ke gadung, gerai sereta meruan agi.

"Sama kitai begulai nyingkang nempa pemansang dudi hari ke gadung enggau lantang agi,” ku iya.

Ia mega meri besai terima kasih ngagai Opis Menteri Pengerai Mensia Mayuh enggau Perintah Lokal (MPHLG) sereta Opis Menteri Pengawa Berumah enggau Perintah Lokal (KPKT) ke sukung nengah inisiatif Local Agenda 21 (LA21) 2025.

Kelimpah ari nya, Adam mega madah siti ari penyelai atur pengawa taun tu iya nya, mandang jalai baru, 4.4 kilometer pemanjai ti nyerangkung Jalai Mengeri nyentuk ke Jalai Marina Utama.

Ku iya, jalai nya ukai semina nyendiaka palan rekreasyen ke engkeman tang nyaup pengawa ngurangka bekau karbon nuju mengeri karbon beresi.

Bemacham aktiviti ngerichah pengerami nya nyengkaum 'Fun Walk', 'Fun Run', 'Fun Ride', senamrobik, mandang chara main pickleball, taekwondo , program sukaneka enggau pemandang komuniti.

Pengerami bela richah enggau pengawa nyua perais, tepa sereta tikit benasip.

Sama datai, Sapit Datuk Bandar Mengeri Miri Ariffin Mohamad, Pemangku Sekretari Kaunsil Mengeri Miri (MBM) Abdul Rahman Taupek sereta Chairman Komiti Mendam Ungkup Juluk Pemansang Meruan (SDG) MBM Kaunselor Jamil Bujang.-EDISI UKAS