LONDON: Sarawak majak negapka penuduk nyadi hab meranak puku besai ba Asia Tenggara nengah pengawa nyendiaka peluang ekonomi, bepelasarka pemeruan enggau inovasyen teknologi.

Sapit Premier Sarawak, Datuk Amar Awang Tengah Ali Hasan madah, nengeri tu nyelinting deka nyadi menua enggau penatai pemisi tinggi sereta mansang manggai taun 2030 nengah bemacham inisiatif strategik.

Ku iya, Sarawak ke mega palan strategik ba Pulau Borneo rembus makit Asia ke ngembuan lebih 4.5 bilion peranak tauka 60 peratus ari populasyen dunya.

"Enggau pemesai manggai 12.4 juta hektar, Sarawak ngembuan bemacham pengereja asal baka tanah alai betanam betupi ke galak, kampung ke bedau diserungkai, mineral, petroleum enggau gas asli.

"Enam pugu sektor ba Strategi Pemansang Pengudah COVID-19 (PCDS) 2030, iya nya kilang, betanam betupi, kampung, dagang temuai, ngeluyang enggau servis.

“Genap sektor tu bisi pengulih meranak puku besai, nyebela entara pemansang ekonomi enggau ngintu rampa menua nyadi pugu pemansang,” ku iya lebuh bejaku ba Sarawak Connects 2025 di London, United Kingdom, Hari Lima jam Malaysia.

Program nya dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Berebak enggau nya, Datuk Amar Awang Tengah madah, Sarawak sama ngangkatka diri nyadi penengkebang kuasa gadung rantau tu enggau pengulih 20,000 megawatt (MW) kuasa hidro.

Ku iya, projek besai baka tekat Batang Ai, Bakun enggau Murum diatu mekal lebih 60 peratus ari kuasa champur nengeri.

"Konsep tekat ai beringkat tauka 'cascading dam' enggau inisiatif ekonomi hidrogen nyadika Sarawak entara penengkebang global ba pengawa ngeluar sereta nyadung hidrogen meruan.

"Pengawa meranak puku Sarawak ke disedia mega seraris enggau prinsip Rampa Menua, Rama enggau Atur Perintah (ESG) sereta Tuju Pemansang Meruan (SDG) Gerempung Bansa Beserakup," ku iya. -EDISI UKAS