BAU: Pengerami Hari Bung Bratak ke diintu ninting taun patut dikelaku chakah agi ba renggat antarabansa ngambi matak mayuh agi pengusung, kelebih agi temuai ari menua luar.

Kaban Kunsil Nengeri (ADUN) Opar, Billy Sujang madah, Serakup Pesaka Bung Bratak ngesan tanggungpengawa besai ba pengawa ngemanah enggau nyagu sejarah Bung Bratak ngagai dunya.

“Bung Bratak ukai semina ngembuan sejarah sereta budaya ke tinggi, tang bisi pengulih besai nyadi palan pematak dagang temuai sereta palan rekreasyen ungkup nembiak," ku iya maya bejadika Pengerami Ngintu Hari Bung Bratak ba Palan Pesaka Bung Bratak, Kampung Tembawang Sauh, Hari Empat tu tadi.

Ku iya, Palan Pesaka Bung Bratak patut diseleti ngambi lantang enggau likun agi ungkup pengusung ti datai.
Berebak enggau nya, perintah udah ngungkup belanja sepenyampau RM1 juta dikena nyeleti bekal kuasa karan ba sitak nya ke sebedau tu semina ngena injin api.

“Enggau nya, mayuh agi program ulih diatur ba Palan Pesaka Bung Bratak ungkup pemaik rayat menua ditu enggau bala temuai," ku iya.

Pengerami ngintu Hari Bung Bratak 2025 richah enggau bemacham program ngerindu ke ati, nyengkaum pengawa betanda enggau muzik tradisional Bidayuh, main rayat, pengawa nyual kraf jari, sereta aktiviti niki Bung Bratak nengah jalai ke disedia.
Sama datai ba pengerami nya Sekretari Politik Premier Sarawak, Datuk John Nyigor enggau Niponi Undek.-EDISI UKAS