LONDON: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg begulai enggau deligit perintah udah betemu enggau Gerempung Kuasa Hidro Antarabansa (IHA) enggau Gempung Ulih Dikena Baru Global (GRA) ba sebuah hotel tebilang ditu, kena Hari Empat.
Program betemu enggau Tuai Pegawai Eksekutif IHA, Eddie Rich enggau raban iya dikena bekunsi kaul strategik entara Sarawak, IHA enggau GRA sereta ngenegap penuduk nengeri Sarawak nyadi pemungkal idar kuasa ke ulih dikena baru ba renggat global.
Tuju randau nya dikena nyerungkai peluang baru ba kuasa ulih dikena baru kelimpah hidroelektrik, nyengkaum kuasa solar, hidrogen enggau nyimpan kuasa.
Nambah ke nya, penemuai nya mega berandauka pengulih kerejasama ba pengawa ngasilka hidrogen gadung nengah penatai kuasa ulih dikena baru ba Sarawak ungkup nempa kuasa dudi hari ke tan sereta meruan agi.
Berebak enggau nya, bala IHA madah ke sida benung ngaga model champur kuasa ke pemadu manah, sereta ngira integrasyen penatai kuasa ulih dikena baru, kelebih agi solar.
Kerejasama nya ngaul pemansang model kuasa begulai Malaysia enggau Indonesia dikena nisih struktur rega kuasa enggau kadar nyerap kuasa ulih dikena baru.
Sama datai iya nya Sapit Premier Sarawak, Datuk Amar Awang Tengah Ali Hasan, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Utiliti (Sarawak Energy Berhad enggau PETROS), Dato Ibrahim Baki, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Luyar Besai Sarawak, Dato Sri Saferi Ali, Sekretari Pekara Wang Sarawak Dato Sri Dr. Wan Lizozman Wan Omar, Sapit Sekretari Sarawak (Perambu Ekonomi & Pemansang), Dato Sri Dr. Muhammad Abdullah Zaidel, Tuai Pegawai Eksekutif Kumpulan Sarawak Energy Datuk Sharbini Suhaili, Tuai Pegawai Eksekutif Kaunsil Solar Global (GSC), Sonia Dunlop sereta bala pegawai kanan Perintah Sarawak.-EDISI UKAS
