LIMBANG: Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail begulai enggau Chairman Kaunsil Pelilih Limbang, Cr Sufian Mohat ngabas palan projek ke digaga nengah Kaunsil Pelilih Limbang iya nya projek Program TransformasyenA menua pesisir (RTP) enggau projek rayat.

Siti ari endur ke dituju maya penemuai nya, iya nya Tebing Sungai Limbang Renggat 1 enggau 2 alai ba Renggat 1, beberapa endur bedagang enggau kiosk udah tembu digaga nyengkaum sebuah begunan ke digela Eatery Park.

Nitih ku Datuk Dr Abdul Rahman, kelimpah ari nya endur engkah kerita sementara enggau perengka guna dagang bela dilanggur digaga.

"Ba projek Renggat 2, aku dipadahka bisi orang bedagang udah bejual ba 15 kiosk ke digaga dia," ku iya maya dirandau media udah ke ngabas projek nya, Hari Dua.

Iya mega ngelalau lebih 500 iku orang dagang berejista enggau Kaunsil Pelilih Limbang bela ulih ngena endur ke bisi disedia dia.

Datuk Dr Abdul Rahman mega madah, Padang Taman Desa Pabahanan ke bela bisi dilawa iya maya nya deka diseruri enda lama agi dikena nyikap perengka guna lumba ke lebih kondusif ungkup peranak menua dia.

Nangkan nya, iya ngelawa Dataran Bandar Limbang, ke alai sebagi ari projek dia udah tembu.

Kelimpah ari iya madah, projek nyeleti Padang Opis Kaunsil bela bisi dilanggur nyengkaum pengawa ngaga laman main nembiak mit dikena nambah ke perengka guna belelak mensia mayuh ba kandang menua nya. -EDISI UKAS