TANJUNG MANIS: Pengawa Sarawak ngenegap ekonomi gadung enggau pemeruan rampa menua majak disungkak nengah chara mai rayat ba Projek Karbon Biru ti diatur Kaunsil Pemansang Kayu Ramu Sarawak (PUSAKA) enggau kerejasama Worldview Climate Solutions Sdn. Bhd. (WCS) di Kampung Paloh enggau Kampung Serdeng, Tanjung Manis.

Randau ke diatur empai lama nya tadi ngemerat pekara nyaga ekosistem bakau ba kandang pemesai 10,300 hektar, lalu nyadi entara inisiatif nyaga karbon biru pemadu besai ba rantau tu.

Tu ukai semina nyaup ngurang karbon dioksida tang ngembuan pengulih ti nyungkak ekonomi timpuh panjai ungkup rayat menua pesisir.

Penulung Menijar Besai Bagi Atur Penatai Asal Meruan PUSAKA, Hamzah Morshidi madah, pemujur projek tu bepanggai enggau sukung sereta kaul ti chakah peranak menua.

Program nya bela digulu agensi perintah baka Opis Pelilih Tanjung Manis, Opis Kampung Sarawak, Kaunsil Kampung Sarawak (SFC), sereta Opis Tanah enggau Survei Mukah.

Tuai raban bansa ke bisi ngulu program randau nya, Penghulu Kampung Paloh, Tuai Bansa ari genturung pendiau ngelingi sereta Tuai Rumah ari Telok Gelam enggau Berangan.

Penerang projek dipejuraika Pegawai PUSAKA, Nizam Abdullah, pengari WCS, Briggette Phillip sereta Pegawai SFC, Winnie Akin.

Sida nerangka pengulih karbon biru mutar ke ubah klimate, nyeliah tebing tasik tusur, sereta nambah manah kualiti biodiversiti pesisir.

Bala mayuh mega diterangka enggau penguntung ari projek baka kereja puang, program pemansang kapasiti, dagang temuai bepelasarka rampa menua enggau nambah ke tikas infrastruktur.

Program randau tu mega meri awak ngagai peranak menua nimbal sereta meri penemu senentang inisiatif tu.

Projek Karbon Biru tu seriris enggau pengeransing Sarawak deka nyadi penengkebang ekonomi gadung ba Malaysia enggau rantau Asia Tenggara, kelimpah nentuka pemeruan ekosistem sereta pemansang komuniti ti inklusif.-EDISI UKAS