KABONG: Pengawa ngenegap perengka guna pelajar menua pesisir majak digaga lebuh Sekula Primari (SK) To’ Eman Nyabor nerima agih belanja nengah Program Transformasyen Menua Pesisir (RTP) sepenyampau RM200,000 ungkup projek nyeleti balai mensia mayuh sekula nya.

Nitih ku Kaban Kunsil Nengeri (ADUN) Kabong, Dato Mohd Chee Kadir, tuju projek nya dikena nentuka nembiak sekula belajar ba alai ti engekeman sereta kondusif agi.

“Pengawa nyeleti perengka guna enggau sekula ba kandang DUN Kabong deka majak dikemeratka.

‘“Tu besai guna ngambi ke nembiak enggau bala pengajar ulih belajar sereta ngajar ba alai ti engkeman,” ku iya ba teks jaku maya pengerami Ramah Tamah ‘Raya Lain Macam’ ba Balai SK To’ Eman Nyabor ke dipenyadika Penghulu Kampung Sessang, Kamaluddin Rambli, ngari ke Dato Mohd Chee Kadir, kena Hari Dua tu tadi.

Dato Chee mega nyemetak madah, iya deka majak nyukung program ke mai pemaik ungkup pemansang pelajar ba sitak Kabong, seraya bekerejasama enggau Opis Pelajar Pelilih (PPD) Saratok dikena nambah manah infrastruktur sekula ba kandang menua nya.

Ba pengerami nya, Gerempung Apai Indai enggau Pengajar (PIBG) SK To’ Eman Nyabor bela nerima pemeri khas RM7,000, dikena nyaup ngatur aktiviti enggau program pelajar sekula.

Sama datai, Penulung Pegawai Sektor Pemansang Nembiak PPD Saratok, Zulkarnain Ahmad; Kepala Pengajar SK To’ Eman Nyabor, Kiplie Ali; Pegawai Kaul Sekula, Sarjan Pegawati Saidah Reduan; Tuai Kampung Nyabor Baru, Bakihan Nani; enggau Tuai Kampung Nyabor Tradisi/Lama, Abang Ahmad Abang Ali.-EDISI UKAS