BEKENU: Siti agi inisiatif ngerapitka seraka pemansang menua pesisir dipenyadi Hari Dua tu tadi nengah Pengerami Nasih Tanah Projek Jematan Kampung Bulau dikemujurka Sapit Premier Sarawak, Datuk Amar Douglas Uggah Embas.

Projek beungkus RM6.09 juta nya disadang tembu dalam timpuh 24 bulan, iya nya tembu bulan Februari 2027 ti ngelai pengeransing Perintah Sarawak nyungkak pemanah tikas inrastruktur menua pesisir, seriris enggau tuju pemansang nengeri tu.

Ku Datuk Amar Douglas, pengawa ngaga projek tu ukai semina meri perengka guna ke manah agi ungkup peranak menua ditu, tang ngamatka semaya perintah mai pemansang.

“Premier Sarawak seruran ngamatka semaya ngemansangka menua ketegal ngira pengelantang rayat.

“Bala tuai nengeri mega majak ransing mai mayuh agi pemansang ngagai kandang menua pesisir,” ku iya madah ba pengerami nya.

Iya mega ngelalau Opis Kereja Raya (JKR) enggau kontraktor ke dichiri ngesan tanggungpengawa enggau pengeransing ngambi ke projek tu ulih tembu nitihka langgur ke udah ditetap.

Ku iya, jematan baru tu deka ngenegap kaul entara kandang Bekenu enggau kandang ngelingi menua nya, laban Kampung Bulau ulih ditengah nengah dua jalai besai, iya nya Jalai Besai Pan Borneo enggau Jalai Nebing Tasik Bintulu–Miri.

Ba pengerami nya, sekeda projek bukai ke udah dikemendarka asil pengeransing Sapit Menteri Pemansang Indu enggau Nembiak Mit Sarawak ke mega Kaban Kunsil Nengeri (ADUN) Bekenu, Datuk Rosey Yunus sama bela disebut, nyengkaum pengawa nyeleti jalai nebing tasik ke Sepupok enggau projek Tebing Sungai Bekenu sereta perengka guna bukai ba Kampung Rambai enggau kandang ngelingi genturung pendiau nya.

Sama datai Direktor Opis Kereja Raya Sarawak, Adj. Prof. Ir. Ts. Gs. Br. PMr. Dr. Cassidy Morris, Sapit Direktor Sektor Infrastruktur, Ir. Wisil Lichok sereta Pegawai Pelilih Subis, Norlila Ulis.-EDISI UKAS