LONDON: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau raban deligit Perintah Sarawak udah datai di London kena Hari Dua serimbai program nemuai gawa empat hari.
Penatai iya pukul 5.30 lemai disambut Pesuruhjaya Tinggi Malaysia di United Kingdom enggau Ireland Utara, Dato' Zakri Jaafar.
Premier Sarawak maya nya disempulang Sekretari Perintah Sarawak, Datuk Amar Mohamad Abu Bakar Marzuki, Luyar Besai Sarawak, Dato Sri Saferi Ali, Sekretari Pekara Wang Sarawak, Dato Sri Dr. Wan Lizozman Wan Omar enggau Sapit Sekretari Perintah Sarawak (Pengatur Ekonomi & Pemansang), Dato Sri Dr. Muhammad Abdullah Zaidel.
Kena Hari Tiga, Premier Sarawak nemuai ngagai Cambridge University Press and Assessment, siti institusyen ukai sekula pegai Universiti Cambridge ti nyendiaka macham produk enggau servis ba pekara pelajar, belajar, pengawa mansik enggau penisih pengulih.
Servis penisih nyengkaum bekaul ngatur macham bansa peresa lebih agi tikas pengulih ba renggat sekula enggau pelajar tinggi sereta peresa standardisasi ti bekaul enggau pengawa peresa ba sekula di Sarawak.
Lalu kena 1 Mei tu, Premier Sarawak deka betuaika bala deligit nemuai ngagai London School of Economics and Political Science (LSE) ngulu program randau bekaul pemeruan lalu ditangkan pengawa besilih Sempekat Pemereti Ati (Mou) ari LSE enggau Perintah Sarawak.
Muak ke lemai, iya dipadahka deka betemu enggau pegawai International Hydropower Association enggau Global Renewable Alliances ba tuju negap kerejasama ba pekara kuasa hidro, seriris enggau pengawa Sarawak nyendiaka kuasa hidro di rantau ASEAN.
Kena 2 Mei, Premier Sarawak deka ngenataika jaku ba mua mayuh ba Sarawak Connects In London: Sarawak's Pathway To Sustainable Growth & Global Market Expansion.
Program nya betemu terus enggau bala pemeranak puku kelimpah bela ngenataika penerang pemadu baru bekaul awak meranakka puku di Sarawak ngagai raban pemeranak puku di United Kingdom enggau renggat antarabansa.
Nangkan nya, kena 3 Mei, iya deka ngulu program Lan Berambeh Anak Sarawak begulai enggau nembiak ari Sarawak ke nampung pelajar di United Kingdom.
Tuju program nya dikena meri awak ngagai rayat Sarawak di United Kingdom nemu agi senentang tuju enggau polisi perintah ngemansangka Sarawak nyerumba tuju Pelin Pemansang Udah COVID-19 Sarawak (PCDS) 2030.
Kelimpah ari nya, program tu bela diatur ngambi ke nembiak Sarawak ulih betemu betungga mua enggau bala tuai sereta pemesai nengeri seraya mantaika penemu sida ngagai Premier Sarawak maya program Townhall. -EDISI UKAS
