CARDIFF: Perintah Sarawak nibak siti agi penyulut ba teknologi global ari pemujur nengkebang KETEQ AI iya nya kereban nukar kuasa bepelasarka Artificial Intelligence (AI) ti keterubah ba dunya asil ari pengelandik peranak menua Sarawak empu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemujur nya sebagi ari asil insiatif Sarawak Semiconductor Roadmap 2030 and Beyond, ti deka nempa Sarawak nyadi palan teknologi betikas tinggi ba rantau tu.
"Pemansang Edge AI Power Converter lebih ari asil ke disadang ti nempa ubah besai ungkup Sarawak. Inovasyen tu deka nyungkak transformasyen landskap teknologi kitai," ku iya.
Iya madah ke pekara nya maya nemuai ngagai CSA Catapult di Cardiff, Wales, Hari Dua.
Penatai iya bela disempulang Sapit Premier Sarawak, Datuk Amar Awang Tengah Ali Hasan, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Pelajar, Inovasyen enggau Pemansang Penau, Datuk Francis Harden Hollis, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Sekretari Pekara Wang Sarawak ke mega Chairman SMD Semiconductor, Dato Sri Dr. Wan Lizozman Wan Omar, Luyar Besai Sarawak, Dato Sri Saferi Ali, Sapit Sekretari Perintah Sarawak (Pengatur Ekonomi & Pemansang), Dato Sri Dr. Muhammad Abdullah Zaidel, Tuai Pegawai Eksekutif CSA Catapult, Raj Gawera enggau Tuai Pegawai Eksekutif SMD Semiconductor, Mohd Shariman Jamil.
KETEQ AI ditengkebang ngembuan pengulih nyidi sereta ngadu baru penanggul sistem enggau chara automatik ba pengelama kurang ari 0.1 milisaat, lalu nyadi sistem pemadu responsif.
Nambah ke jaku iya, Premier Sarawak madah, teknologi nya ngelai siti agi pemujur singkang sereta mandangka pengeransing Sarawak nengkebang pengulih teknologi strategik diri empu.
Ku iya, projek ngaga KETEQ AI udah berengkah ari 23 April 2024 nangkan pengawa nyain Sempekat Pemereti Ati ari SMD Semiconductor enggau CSA Catapult di Parlimen United Kingdom.
"Kerejasama tu meri awak ngagai Sarawak numbuh ekosistem inovasyen ti lebih agi tegap sereta nyukung pengerembai sektor teknologi," ku iya madah baru.
KETEQ AI ngembuan pengulih aplikasyen nyengkaum ba grid pintar, sistem pengangkut karan, teknologi autonomi, Internet of Things (IoT) industri, sistem perambu ngatur enggau mekanisme ngatur kritikal.
Maya nya mega, Shariman Jamil bisi mandangka chara ngena prototaip teknologi nya ti ngayanka pengulih mutar macham gaya operasyen kompleks.
Nengah rambai jaku 'Innovation in just a Snap', KETEQ AI ngelai pengulih peranak Sarawak nengkebang teknologi betikas dunya, lalu ngangkatka nama nengeri tu datai ba tikas global ba pekara AI enggau sistem kuasa pintar. -EDISI UKAS
