SERIAN: Program Serian Agrofest 2025 keterubah diatur ba Dataran Bandar Mutiara Tebedu disadang matak penatai lebih 4,000 iku mensia mayuh nyengkaum ari Kalimantan Barat, Indonesia.

Ba aum media kena Hari Satu, Kaban Kunsil Nengeri (ADUN) Kedup, Datuk Martin Ben madah, Agrofest 2025 ngembuan tuju mandangka produk betanam betupi enggau orang berikan, teknologi betanam betupi digital enggau program pemansang betanam betupi.

“Program tu mega deka nyadi pelasar alai Opis Betanam Betupi enggau mensia mayuh betemu, sereta ngenegap kaul komuniti nengah macham aktiviti sepemanjai program diatur,” ku iya.

Serian Agrofest 2025 mega deka nyadi program ninting taun ba Kalendar Pengerami Bagi Menua Serian ti deka digulu mensia mayuh ari Tebedu, Serian, Siburan enggau ba kandang entara menua di Indonesia.

Program tu dipelabaka ulih ngerikod penguntung manggai RM100,000 enggau lebih 70 penyereta program pemandang ari agensi perintah, orang dagang, kompeni peribit enggau pengawa nyual produk menua.

Pengawa ke deka diatur maya nya nyengkaum program pemandang teknologi betanam betupi, kus tanam komiditi, mandang chara murih ikan enggau manduk undang, nyual produk bekebun, pekit karaoke, pekit ngelinsu nembiak mit, pekit ai tuak pemadu manah enggau konsert Agrofest.

Pengerami bejadi Agrofest Serian 2025 disadang diatur kena 23 Mei 2025 deka dipenyadi Menteri Industri Pemakai, Komoditi enggau Pemansang Kandang Menua Sarawak (M-FICORD), Dato Sri Dr Stephen Rundi Utom.

Program bela dirichah enggau pengawa bejalai bebala mayuh Gawai “Nginyon” ti deka digulu rayat pupu bansa di Serian.

Serian Agrofest sebagi ari pejalai Agrofest ba selampur nengeri nyengkaum Limbang, Pakan, Spaoh enggau Sibu.

Sama datai ba aum media, ADUN Bukit Semuja, John Ilus, ADUN Tebedu, Dr Simon Sinang Bada enggau Residen Bagi Menua Serian, Caroline Cleophas Joseph.-EDISI UKAS