KUCHING: Pemain industri program dagang ari menua tu enggau menua bukai ditesau ngambi bagi Anugerah Borneo Inspires Legacy (BILA) 2025, ti disadang ngerandang mayuh agi awak kerejasama seraya ngerembai bungkur pemesai dagang.

Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madah, pengawa nganjung nama ngambi bagi ba Anugerah nya dibuka nyentuk 15 Jun 2025 ti ulih dipeda ba laman rama Business Events Sarawak (BESarawak).

Ku iya, sepenyampau 18 anugerah deka dipekit nengah lima kategori besai iya nya, Penyulut Legasi Konvensyen, Penyulut Legasi Pemandang, Tanggung Pengawa Rama Korporat Aum enggau Insentif Korporat, nyengkaum Industri Sarawak enggau pekara media.

"Sama kitai nempa mayuh agi program baka tu dikena meri inspirasyen ngagai komuniti, lalu nempa legasi nyentuk dudi hari,” ku iya ba aum media BILA 2025, ditu, Hari Satu tu tadi.

Sama datai Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan, Chairman BESarawak Dato Sri Abang Abdul Karim Tun Datuk Abang Openg, Sapit Sekretari Perintah Sarawak (Operasyen) ti mega Sapit Chairman BEsarawak Datu Hii Chang Kee, Sekretari Mendam Opis Menteri Dagang Temuai, Industri Kreatif enggau Seni Pemerindang Datu Sherrina Hussaini, Kaban Komiti Direktor BEsarawak Dr Margaret Chan Kit Yok enggau Tuai Pegawai Eksekutif Amelia Roziman.

Tuju BILA 2025 diatur dikena meri basa ngagai penyulut ke ditempa ba program dagang.-EDISI UKAS