KUCHING: Gerempung Pemansang Pelajar Jaku Iban (AEDIL) udah ngatur penemuai basa ngagai Sapit Premier Sarawak, Datuk Amar Douglas Uggah Embas di Wisma Bapa Malaysia ditu nyerumba pengeransing negap kerejasama strategik ngemansangka pelajar Jaku Iban.

Penemuai basa nya diuluka Presiden AEDIL, Ambrose Jarit enggau Sapit Presiden AEDIL, Abit Hong sereta bala komiti ke bukai.

Maya nya, AEDIL bisi nerangka sejarah penumbuh gerempung enggau pemujur ke udah ditempa sida kenyau ari taun 2009.

Sida bela madah ke diri semampai chakah nyungkak profesionalisme pengajar Jaku Iban, negap kerejasama enggau agensi perintah sereta ngeringka polisi ti nyukung pengawa nyaga enggau pemansang Jaku Iban.

Dikena ngelai sukung perintah ngagai pengawa nya, Datuk Amar Douglas Uggah bisi ngungkupka belanja RM150,000 ngagai AEDIL.

Tuju pemeri nya dikena ngemujurka agi inisiatif pelajar Jaku Iban ti ukai semina dikena berandau tang bela mandangka sejarah, daya idup enggau pesaka ti meseti dijaga, ditegap sereta ditampung rebak dudi.

AIDEL mega madah ke diri semampai nyungkakka tikas pelajar Jaku Iban ti patut dikemegah nyerumba juluk ati Sarawak deka nyadi nengeri progresif enggau lantang. -EDISI UKAS