LUNDU: Projek Jematan Batang Rambungan disadang tembu Julai 2026 tumu ari ke dilanggur sebedau tu, Julai 2027.

Sapit Premier Sarawak, Datuk Amar Douglas Uggah Embas madah, pemutus nya digaga bepun ari penemuai iya ngabas projek nya begulai enggau Opis Kereja Raya (JKR) sereta bala kontraktor, Hari Satu.

Ku iya, jematan 560 meter pemanjai ke beungkus RM82 juta nya nyadi projek 'rescue' ke diatu digaga kompeni Titanium ketegal kontraktor sebedau tu enda mujur nembuka projek nya.

"Kompeni tu bisi rikod manah ba pengawa ngaga projek jematan lalu kitai meda semua kereban projek endang udah bisi kelimpah kabel ke diatu benung dianjung.

"Kitai andal pengulih sida nembuka projek tu," ku iya madah maya dirandau media sepengudah ngabas projek nya.

Datuk Amar Douglas Uggah madah, gaya hari ke manah maya tu bela deka nyaup ngemujurka projek nya tembu digaga.

Ba pekara bukai, iya madah, Perintah Sarawak diatu benung ngelangkar chara baru dikena ngadu jalai batang ti udah enda dikena agi ba selampur nengeri.

Ku iya, tu deka nentuka pengawa ngaduka jalai nya digaga enggau mujur ngena belanja ke besai agi nyengkaum ari Malaysian Road Records Information System (MARRIS).

"Enti jalai tu udah tembu diadu nyadi jalai nengeri, kitai ulih ngena agih belanja ke besai agi.

"Tu beguna bendar laban jalai batang lama mayuh dikena rayat di menua pesisir," pia ku iya.

Iya mega madah, naka ke diatu, perintah udah ngatur randau enggau pengari rayat nentuka jalai ke patut diadu alai pekara nya benung dibai ngagai Kabient Nengeri.

"Kitai udah bisi penyampau belanja ke deka dikena lalu bagi jalai enggau jematan ke patut digaga. Diatu semina nganti pemutus aja," ku iya.

Bela datai maya nya, Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo. -EDISI UKAS