SIBU: Serimbai Pengerami Ngintu Genap 50 Taun Jubli Emas Kolej Vokasional Sibu, institusyen nya dirami kelai bejalaika pangku pengawa besai negap pelajar teknikal enggau vokasional (TVET) di Sarawak.
Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu madah, kenyau ari ditumbuh, kolej tu udah nyadi pugu besai nempa pengereja bepengelandik tinggi seraya nyungkak pemansang nengeri enggau menua.
“Dunya diatu chukup bebida dibanding taun 1975, lebuh menua agi napi keruga komunis.
“Diatu, kitai idup lantang asil ari semangat penyerakup enggau pengelantang entara komuniti pupu bansa,” ku iya maya bejadika Pengerami Ngelalu Pengabang Penyerakup MADANI enggau Ngelanchar Jubli Emas 2025 Kolej Vokasional Sibu ditu kena Hari Enam.
Iya madah, penyerakup nya pugu pengering nentuka bemacham raban duduk semija, berandau lalu bekerejasama ungkup pemansang Sarawak ti lantang enggau progresif.
Dato Gerald mega madah ke sepanjai 50 taun ditumbuh, Kolej Vokasional Sibu udah nempa mayuh alumni ti mujur ba bemacham bidang.
Iya andal ke bala nembiak kemaya hari ulih nyingkang jauh agi napi pemar ke nyadi nyengkaum isu ungkus pengidup niki.
Lebuh bejaku, iya mega nyebut pasal inisiatif perintah nengeri di baruh iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti udah bejalaika bemacham inisiatif baru baka sektor hidrogen, pengangkut bas pintar sereta industri aeroangkasa.
Ku iya, inisiatif tu ngerandang peluang besai ngagai bala nembiak ngena pengelebih bidang TVET.
“Tang, nadai pemujur ti ulih dijapai enti nadai pengelandik. Tanya kitai diatu, enti kita nadai pengelandik, sapa ti deka ngaji kia?” ku iya seraya ngelalau bala nembiak ngena peluang belajar di kolej tu enggau manah lalu anang ngelusu laban nya nyadi munsuh mensia.
Iya nyemetak madah, pengawa nyikap diri beguna endar ba jeman teknologi kemaya hari ti disungkak Artificial Intellegence (AI).
Iya mega madah, bala nembiak ukai semina meseti bepenemu tang mega bisi peneleba sereta ulih berati ke bida entara pekara ti betul enggau salah.
Kelai sukung ba pemansang pelajar di kolej nya, Dato Gerald mega ngemendar agih belanja Projek Mit Pemansang Menua Pesisir (MRP) penyampau RM10,000 ngagai Gerempung Apai Indai enggau Pengajar (PIBG) Kolej Vokasional Sibu. - EDISI UKAS
