KUCHING: Konsep Segulai Sejalai ke mai reti idup begulai dalam penyerakup sigi setipak enggau chura pengidup ba Sarawak.

Menteri Dagang Temuai, Seni enggau Budaya, Dato Sri Tiong King Sing madah, Sarawak ukai semina palan pematak dagang temuai, tang mega mandangka ulah “Perpaduan dalam Kepelbagaian” ke bendar, nyadika nengeri tu nyelai ba landskap ASEAN ke penuh diversiti.

“Ba Sarawak, leka jaku Iban ‘Segulai Sejalai’ ukai semina slogan, tang ulah pengidup besehari-sehari komuniti pupu bansa enggau jalai pengarap ke sama begulai ngasai ke pemansang sereta pengulih nengeri tu," ku iya.

Iya madah munyi nya ba Pengerami Makai Lemai Aum Kaunsil Komuniti Sosio-Budaya ASEAN (ASCC) ke-33 ditu, lemai Hari Tiga tu tadi.

Iya madah ke semangat tu nyata dipeda maya ngintu Hari Besai baka Gawai, Hari Raya, Krismas enggau Taun Baru China ti diintu begulai nadai ngira raban bansa enggau jalai pengarap.

Dato Sri Tiong madah, Sarawak ke ngembuan 34 etnik diangkat nyadi chunto penyerakup enggau pengelantang ba komuniti pupu bansa.

Kaban Parlimen Bintulu ngelalau bala deligit ASEAN berati ke ulah nya ba penemuai sida ngagai palan pesaka budaya baka Annah Rais enggau Kampung Budaya Sarawak.

Nengah juluk “Segulai Sejalai” nyadi pelasar besai, Sarawak sekali agi mandangka diversiti ukai penanggul, tang pengering nempa komuniti serantau ke beserakup.-EDISI UKAS