MUKAH: Juluk peranak Kampung Klid enggau Kampung Plajau ulih nengah jalai darat ke Pasar Dalat deka nyadi nyata lebuh Projek Ngaga Jalai Kampung Medong/Lebrasau/Kampung Klid diatu manggai 48.56 peratus udah digaga.

Projek besai ti disadang tembu ujung Januari 2026 nya deka nentuka komuniti ba sitak nya enda agi bepanggai ngagai jalai ai ke ditengah sida ngelama tu.

Maya ngatur pejalai ngabas seraya gawa ngagai taba projek Hari Tiga tu tadi, Sapit Premier Sarawak, Datuk Amar Douglas Uggah Embas ngenataika pengirau ati pengudah lebih 70 hari projek nya laun, tang meri jamin benung berandau enggau raban kontraktor dikena mutar lengkas penanggul tu.

“Projek tu udah laun lebih 70 hari lalu tu ngirau ke ati. Taja pia, kitai deka ngiga chara mutar enggau jampat ngambi ke projek tu tembu nitih taga.

“Kitai mega udah berandau enggau raban kontraktor ngambi ke pekara nya diputarka lalu projek tembu ba Januari 2026,” ku iya madah ngagai media.

Skop projek tu ngaul pengawa ngaga jalai baru 11.5 kilometer, jalai chabang (spur road) sepemanjai 0.17 kilometer sereta pengawa ngaga tiga jematan ngelayang Batang Oya.

Jalai tu deka nyambung Pelilih Dalat enggau Kampung Klid, Kampung Plajau sereta Sekula Primari (SK) Klid/Plajau.

Naka diatu, peranak genturung pendiau agi ngena bot laju urung 30 minit ari ujung Jalai Dalat–Lebrasau nuju rumah sida.

Entukae sida suah diengkah ba palan ngambi ai Dalat/Lebrasau.

Datuk Amar Douglas Uggah minta raban kontraktor bebendar nembu ke pengawa sereta nyeraris semua pengawa manah agi dikena nembuka projek nitih taga.

Sama datai ba pejalai ngabas taba projek nya, Sapit Menteri Ekonomi, Datuk Hanifah Hajar Taib; Residen Bagi Menua Mukah, Datu Kueh Lei Poh sereta temuai dipebasa ke bukai.-EDISI UKAS