KUCHING: Projek Wisma Melayu Islam ba Jalai Diplomatik, Petra Jaya disadang tembu suku ketiga taun tu.

Sapit Premier Sarawak, Datuk Amar Awang Tengah Ali Hasan madah, enti nitih begunan nya tembu Julai tu, tang agi bisi utai ditambah nitih sanding penemu ari Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

"Kitai nyelinting Wisma Melayu tu tembu suku ketiga taun tu," ku iya lebuh bejaku ba Pengerami Samarindok Aidil Fitri 1446/2025m ti diatur Amanah Khairat Yayasan Budaya Melayu Sarawak (AKYBMS) kena lemai Hari Tiga.

Sama datai, Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi, Premier Sarawak enggau bini, Puan Sri Datuk Amar Juma'ani Tun Tuanku Bujang.

Ku iya, begunan tu deka disikap siti balai mayuhguna ti ulih nangkup 2,000 iku lalu engkeman diguna ngatur mayuh macham pengerami baka pengawa nikah enggau program rasmi kelimpah alai galeri tauka muzium Melayu Sarawak sereta palan penerang enggau pelajar bekaul sejarah enggau budaya Melayu.

Speaker Kunsil Nengeri Sarawak, Tan Sri Datuk Amar Mohamad Asfia Awang Nasar; Sekretari Sarawak, Datuk Amar Mohamad Abu Bakar Marzuki; Sapit Chairman AKYBMS, Dato Sri Mohd Naroden Majais, Menijar Besai Amanah Khairat Yayasan Budaya Melayu Sarawak (AKYBMS), Datu Dr Sanib Said sereta temuai dipebasa ke bukai mega bisi datai. -EDISI UKAS