KUCHING: Komuniti Melayu di Sarawak patut nyikap diri enggau anak sida ngena penemu enggau pengelandik nentuka sida ulih besemekih enggau bansa bukai ba pemansang nengeri.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pelajar 'senyata' besai nempa ulah besemekih, lebih agi ba raban nembiak Melayu ngambi ke sida enda tinggal ari pemansang deras ke benung dirandang Perintah Sarawak.
“Aku deka ke orang Melayu, lebih agi komuniti rumpun Melayu, berati ke dini penuduk kitai dudi hari.
"Dunya udah berubah, lalu dikena besemekih, kitai meseti berani ngubah runding lalu nyikap diri ngena penemu enggau pengelandik.
"Nya alai kami ba perintah chukup ngemeratka pemesai guna pelajar.
"Enti kitai deka ngiga semangat besemekih, kitai meseti besikap dikena besemekih enggau orang bukai," ku iya.
Iya madah munyi nya maya bejaku ba Pengerami Samarindok Aidil Fitri 1446/2025m ti diatur Amanah Khairat Yayasan Budaya Melayu Sarawak (AKYBMS) ba sebuah hotel tebilang ditu, lemai Hari Tiga.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar sereta bini, Toh Puan Datuk Patinggi Fauziah Mohd Sanusi sama datai ngerichah pengerami nya.
Datuk Patinggi Abang Zohari mega madah, Perintah Sarawak udah nyendiaka bemacham perengkaguna enggau infrastruktur pelajar ba sitak majoriti peranak Melayu enggau Bumiputera, nyengkaum akses ngagai pelajar tinggi pechuma ba universiti ditu.
Ku iya, pengulih nembiak Melayu besemekih ukai bepanggai ba pendiau pengidup, tang bepanggai ba peluang enggau ransing belajar sereta ngena sistem pelajar ke disedia.
"Kami nyendiaka peluang tu ngagai semua nembiak Sarawak, seagi sida bisi tingki ‘K’. Nembiak Melayu mega bisi diberi peluang.
“Sida meseti andal ulih besemekih lalu bekerejasama enggau bansa bukai baik ari sukut pekara wang tauka penemu," ku iya.
Ku Datuk Patinggi Abang Zohari, ubah ulih dijapai lebuh bisi pengeleda lalu sedia deka ngubah diri.
Sama datai, bini Premier Sarawak, Puan Sri Datuk Amar Juma'ani Tun Tuanku Bujang; Sapit Premier Sarawak, Datuk Amar Awang Tengah Ali Hasan; Speaker Kunsil Nengeri Sarawak, Tan Sri Datuk Amar Mohamad Asfia Awang Nasar; raban Kabinet Menteri Sarawak, Sekretari Perintah Sarawak, Datuk Amar Mohamad Abu Bakar Marzuki; raban Kabinet Sapit Menteri Sarawak, Sapit Chairman AKYBMS, Dato Sri Mohd Naroden Majais, Menijar Besai Amanah Khairat Yayasan Budaya Melayu Sarawak (AKYBMS), Datu Dr Sanib Said sereta temuai dipebasa ke bukai. -EDISI UKAS
