BINTANGOR: Kaban Kunsil Nengeri (ADUN) Meradong, Datuk Ding Kuong Hiing datai ba Pejalai Mantar Gawai Hari Kedua ngagai sekeda rumah panjai ba Sungai Petai enggau Sungai Kesa, apin lama.

Ba sesyen begulai enggau peranak rumah panjai, Datuk Ding udah ngena peluang nya mendingka sebana Tuai Rumah enggau peranak rumah panjai ke bisi penanggul sereta peminta sida.

Iya mega madah ke pengeran mak pemansang ba sitak Meradong.

“DUN Meradong betuah laban ngembuan dua pengari rayat ti seruran ransing ngemansang ke menua – Aku empu enggau Sapit Menteri Pengeraja Asal enggau Pemeruan Rampa Menua ke mega Kaban Parlimen Sarikei sereta ADUN Repok, Dato Sri Huang Tiong Sii,” ku iya.

Kelimpah nya, Datuk Ding nyemetak madah, pemansang semina ulih dipejalai enti rayat terus nyukung Perintah Sarawak ti diiring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

“Aku ngelalau peranak rumah panjai terus meri sukung tegut ngagai pengari rayat Gabungan Parti Sarawak (GPS).

“Tu besai guna ngambi ke sebana rayat majak didinga lalu pengelantang semua terus dijaga," ku iya. -EDISI UKAS