KUCHING: Pengawa nyain Memorandum of Agreement (MoA) Perintah Sarawak enggau Universiti Malaya (UM) dikena numbuh 'Kursi Derma Kekal Premier Sarawak' ngemerat empat batang pekara ba ekonomi baru.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu nyengkaum ekonomi gadung, ekonomi hidrogen, nyaga pengerai bioteknologi enggau Artificial Intelligence (AI).
Ku iya nerang, nengah MoA tu, UM deka ngatur 'syarahan' ninting taun ‘Kuliah Yang Amat Berhormat Premier Sarawak’ ke dilangkar dikena meransang randau orang mayuh, besilih penemu enggau dialog polisi ba pekara bekaul.
“Program tu deka ngemerat pekara ti besai guna ba ekonomi baru, baka ekonomi gadung enggau ekonomi hidrogen. Ekonomi gadung nyengkaum dagang karbon enggau kredit karbon ke ngembuan tuju dikena ngintu rampa menua kelimpah ekonomi hidrogen, nyengkaum bioenergi enggau kuasa hidro ke mega penatai kuasa beresi dudi hari.
“Pengawa nyaga pengerai bioteknologi mega dikemerat, alai sains diguna dikena nyungkak pengerai, perubat enggau nagang penyakit lalu enda tinggal mega, iya nya pemesai guna AI, ke ngasuh kereja lebih agi efisyen sereta jampat, taja pan meseti diguna enggau atur ti betul ngambi ke meruan lurus sereta likun.
“Semua inisiatif tu seriris enggau Juluk Ati Pemansang Meruan (SDG), ke mega ngesan tanggungpenggawa besai ba ubah klimet,” ku iya.
Iya madah munyi nya maya bejaku ba Pengawa Nyain MoA Derma Kekal Premier Sarawak entara Perintah Sarawak enggau UM ti diatur ba Wisma Bapa Malaysia ditu, Hari Tiga.
Nerang silik, iya madah inisiatif tu deka nyadi platform ngagai agensi enggau pengaga polisi di Sarawak, lebih agi ari sukut penemu kritis enggau pemadu baru, ti ulih meransang pemutus ke lebih terang sereta nyungkak pemansang ungkup kandang menua tu.
“Aku arap program tu deka digulu, ukai semina pengaga polisi enggau tuai industri, tang mega komuniti akademik baka universiti, pemansik enggau pemelajar kitai ke besai guna ba ngelangkar penemu baru.
“Ba timpuh panjai, pengawa tu deka ngenegap kapasiti intelektual Sarawak, nyukung urus perintah ti manah, lalu nyikap rayat kitai matak jalai ba dunya ke majak deras,” ku iya.
Sama datai, Sapit Premier Sarawak, Datuk Amar Profesor Dr Sim Kui Hian; Sekretari Perintah Sarawak, Datuk Amar Mohamad Abu Bakar Marzuki; Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol; Datuk Amar Jaul Samion; Penyanding Penemu Undang-Undang Sarawak Dato Sri Talat Mahmood Abdul Rashid; Mandal Chanselor UM, Dato Seri Ir Dr Noor Azuan Abu Osman enggau Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel. -EDISI UKAS
