KUCHING: Perintah Sarawak deka ngubah Ordinan Biodiversiti Sarawak dikena bejalaika pansik enggau ngaga asil pansik biodiversiti nyadi komersial.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ubah nya beguna bendar dikena nentuka pengulih komersial kereban biodiversiti mulaika penguntung, nyengkaum nengah kerejasama enggau sida ke bekaul.

“Nengah Ordinan ke diatu, Palan Macham Biologi Sarawak (SBC) enda dikemendar bejalaika pengawa komersial.

“Aku udah mutuska ordinan nya diubah ngambi ke pansik enggau pengawa komersial ulih dipejalaika, lalu asil iya ulih dikunsi enggau dunya,” ku iya maya Bejadi Vision With Action For Biodiversity: Policy And Plan di Imperial Hotel ditu, Hari Dua tu tadi.

Nambah ke jaku iya, Premier Sarawak madah, siti ari pengawa mansik ke ulih digaga nyadi komersial iya nya pansik ba lumut ti ulih nyadi kereban api bio, nyengkaum Sustainable Aviation Fuel (SAF)

Ku iya, nyema Palan Macham Biologi Sarawak (SBC) enda dikemendarka bekerejasama enggau chara komersial, Sarawak tau lenyau peluang besai ba industri gadung.

“Enti lumut tu ulih ngasilka kereban api bio, lalu nyadi SAF, kitai ulih ngurangka pemansut karbon ari bilun,” ku iya

Kelimpah ari nya, Datuk Patinggi Abang Zohari madah, diatu bisi bansa kayu baru, iya nya Kalapaya ke manah agi ari Akasia ti ulih digaga nyadi biojisim, dikena ngasilka kuasa hibrid ti ngena champur biojisim, gas enggau hidrogen.

Sama datai ba pengerami nya, Sapit Premier Sarawak Datuk Amar Professor Dr Sim Kui Hian, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Perambu Mengeri, Atur Tanah enggau Rampa Menua Sarawak, Datuk Len Talif Salleh, Sekretari Mendam Opis Menteri Pengeraja Asal enggau Pemansang Mengeri Sarawak, Datu Abdullah Julaihi sereta Pengari Residen UNDP ke Malaysia, Singapura enggau Brunei Darussalam, Edward Vrkíc.-EDISI UKAS