KUCHING: Penau enggau pengulih indu ba pengawa ngenegap pemansang nengeri patut dikena manah kelebih agi ngisi penuduk nyadi tuai sereta nyungkak sektor strategik.

Chairman Palan Direktor Korporat Malaysia (ICDM), Tan Sri Dato Zarinah Anwar madah, pengawa ngenegap orang indu nengah pemansang kapasiti enggau nambah pengelandik nentuka orang indu dikaul sama bela enggau orang lelaki ba renggat organisasyen baik ba sektor perintah tauka kompeni.

“Batang tuju dikena ngenegap penau orang indu, mantu sida napi pemar nempa pemujur dalam pengawa.

"Kitai deka ngerandang mayuh peluang ungkup orang indu mangku pengawa nyadi tuai," ku iya.

Iya madah munyi nya maya dirandau media pengudah penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Wisma Bapa Malaysia, Hari Dua.

Nambah ke nya, iya madah, statistik mandangka lebih 60 peratus graduet universiti di Malaysia orang indu, tang mangku pengawa besai enggau nyadi tuai agi dikuasa sida ke lelaki.

Gaya tu begunaka perati besai ngambi ke penau orang indu enda dibasau ngapa, ku iya.

“Endang besai reti semua organisasyen, nyengkaum perintah nengeri, beambi ulih enggau pengelandik - baik lelaki tauka indu- ngambi ulih ngasilka pemutus pemadu manah," ku iya nambah ke jaku.

Ditanya senentang timbal ke diberi Datuk Patinggi Abang Zohari, Tan Sri Zarinah madahka Premier Sarawak meri sukung penuh enggau inisiatif pemansang kapasiti orang indu ke dipeda setipak enggau visyen perintah.

Ku iya nerang, Datuk Patinggi Abang Zohari amat ngemeratka pemansang pengereja lalu meda kerejasama begulai enggau SCOPE nyadi pelasar besai dikena ngenegap kapasiti enggau pengelandik pengereja Sarawak.

Sama datai ba penemuai basa nya, Sekretari Perintah Sarawak Datuk Amar Mohamad Abu Bakar Marzuki, Luyar Besai Sarawak Dato Sri Saferi Ali, Tuai Pegawai Eksekutif SCOPE Joseph Lim Jit Sek enggau Mandal Chanselor enggau Tuai Pegawai Eksekutif Kolej Universiti Iring tuai Indu Asia Prof Dr Sushila Khrisnaswamy-Chang. -EDISI UKAS