KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima penemuai basa deligit Komiti Parlimen Gerempung Dagang Ngatika Diri Eropah (EFTA) di Wisma Bapa Malaysia, Hari Dua.

Penemuai basa nya sebagi ari pejalai kereja sepengelama seminggu ke Malaysia ba pengawa ngenegapka kaul entara parlimen, ngulihka penerang enggau penemu, sereta bulih sukung politik ungkup Sempekat Bekunsi Ekonomi Malaysia-EFTA (Malaysia Economic Partnership Agreement – MEEPA) ke udah diputus kena 11 April 2025.

Penemuai basa nya betuai ke Chairman Komiti Parlimen EFTA & Tuai Deligit Iceland, Grimur Grimsson.

Sama datai, Sapit Sekretari Perintah Sarawak (Perambu Ekonomi enggau Pemansang) Dato Sri Muhammad Abdullah Zaidel, Tuai Deligit Norway Trine Lise Sundnes, Tuai Deligit Switzerland Thomas Aeschi enggau Tuai Deligit Liechenstein Sebastian Gassner sereta temuai dipebasa ke bukai.

Ba aum media, Grimur madah, penemuai basa ngagai Datuk Patinggi Abang Zohari dikena berandauka senentang industri kuasa gadung.

"Kami benung berandauka senentang pemansang enggau pengeluar kuasa lebih agi ba kuasa gadung.

"Pemeruan enggau kuasa gadung pugu pekara tu nyengkaum meresi karbon," ku iya.

Berebak enggau nya, Trine Lise Sundnes madah, Norway bela rindu ati enggau industri alga ke dipejalaika di Sarawak lebih agi ke diguna ba kuasa gadung.

Ku iya, Norway bisi pengeluar alga ke besai ba konteks bekal pemakai.

"Tang di Sarawak, maya kami ngelawa palan biodiversiti, kami mega meda teknologi ke maju agi bekaul pekara nya, nyadi nya narit ati," ku iya. -EDISI UKAS