DEBAK: Berita manah ngagai peranak Debak lebuh Sapit Menteri Pengelantang Komuniti Sarawak, Datuk Mohammad Razi Sitam madah, perambu nyeleti Sekula Primari (SK) Datuk Bandar Debak nengah kerejasama begulai enggau Opis Pelajar.

Nitih ku iya, projek nya ngaul pengawa ngaga begunan baru dikena nganti struktur lama ke udah jai, kelimpah ngaga perengka guna tambah nyaup penyampau nembiak ti majak nambah.

“Tuju langgur tu ukai semina nyendiaka endur belajar ti lebih lantang agi, tang nyadi sebagi ari pengeransing perintah ngenegap sektor pelajar menua pesisir,” ku iya.

Kaban Kunsil Nengeri (ADUN) Saribas nya madah munyi nya maya ngulu Pengerami Ramah Tamah Aidilfitri SK Datuk Bandar Debak 2025 ti diatur richah ba kandang sekula nya, kena Hari Dua.

Kelimpah ari nya, pengerami nya mega richah enggau pengawa nyua perais Pekit Pintu Kuta Kampung Melayu Debak ti diatur serimbai ngintu Aidilfitri, mandangka kreativiti sereta semangat beripai komuniti dia.

Pengerami baka nya ukai semina ngerapitka kaul entara tuai menua, komuniti enggau palan pelajar, tang mega sama ngenegap pemansang pelajar ti meruan agi ba sitak Saribas.

Bela datai, Tuai Raban Bansa enggau Tuai Komuniti Melayu Pelilih Debak, Kepala Pengajar sekula ngelingi Zon Debak sereta bala peranak menua. - EDISI UKAS