KOTA KINABALU: Opis Menteri Utiliti enggau Telekomunikasyen Sarawak (MUT) enggau Suruhanjaya Tenaga Sabah (ECoS) nanggam Sempekat Pemerati Ati (MoU) ngambi sama ngaku label pengelikun perengka karan enggau gis, sereta ngenegapka kerejasama strategik kededua nengeri nya.

Pengawa nyain MoU ti diatur ba Konvensyen Antarabansa Sabah (SICC), sehari tu dikemataka Kepala Menteri Sabah, Datuk Seri Panglima Hajiji Noor.

Menteri Utiliti enggau Telekomunikasyen Sarawak, Dato Sri Julaihi Narawi madah, sempekat nya ngambi perengka karan enggau gis bulih label pengelikun baka SIRIM ti ulih dikena ba kededua nengeri.

“Kitai setuju ke perengka karan enggau gis bisi label SIRIM enggau ke bekaul diterima ba Sabah enggau Sarawak. Tu ngambi ke bisi 'free flow' ungkup ngaku perengka karan enggau gis,” ku iya madah ngagai pemberita pengudah pengerami nya.

Sama datai, Sapit Menteri Utiliti (Sarawak Energy enggau Petros), Dato Ibrahim Baki, Direktor Agregator Gis Sarawak, Kasvenda Kassim sereta pegawai kanan ari kededua agensi.

Pengawa besilih dokumen MoU entara Tuai Pegawai Eksekutif ECoS, Datuk Ir. Abdul Nasser Abdul Wahid ngari ke Perintah Sabah enggau Sekretari Mendam MUT Sarawak, Datu Jafri Lias mega bisi diatur.

Lebuh bejaku, Datuk Ir. Abdul Nasser madah ke MoU nya pengawa besai ba nyeraris sistem pengatur ba kededua nengeri.

Pengawa proaktif tu dikeandal mai penguntung ngagai pengimport, penyadung, penyual enggau penguna di Sabah enggau Sarawak, enggau standard pengelikun ti sebaka sereta bela diaku.-EDISI UKAS