DARO: Raban indu dilalau ngambi ke enda muai awak ngenegapka diri ba pekara ekonomi enggau dagang nengah mayuh macham inisiatif pemansang ke disediaka ba menua tu.

Lalau nya dipadah Kaban Kunsil Nengeri (ADUN) Daro, Safiee Ahmad maya bejaku ba Pengerami Nutup Kus ‘Woman Skills Training (WST) Outreach @ Daro’ ba Balai Mensia Mayuh Daro, kena Hari Tiga tu tadi.

Iya madah, Kus Woman Skills Training (WST) Outreach @ Daro tu siti peluang ti berega ungkup raban indu menua tu nempa pengelandik ba pekara kulinari, pemajik, urut spa enggau bejait.

“Indu pugu ngemansang komuniti. Nengah program baka tu, kitai ukai semina ngelatih sida enggau pengelandik praktikal, tang nyikap sida ngambi ke andal sereta ulih besemekih nyaup pemujur ba dagang,” ku iya nerang.

Iya mega nesau raban indu ngambi ke beambi ulih enggau perengka guna ke deka disediaka nengah projek pemansang ba ditu, baka ‘Anjung Usahawan Daro’ enggau ‘Bangunan Pasar Tani Kekal’, ti dipeda ullih nyadi platform strategik ngagai bala orang dagang menua tu, kelebih agi sida ke indu.

Ba pengerami nya, Safiee bela nyuaka pemeri belanja ngagai Biro Indu Kandang Menua Daro dikena nyukung pejalai aktiviti sida.

Pengerami nutup kus nya bela dirichah enggau Pengerami Ramah Tamah Aidilfitri. -EDISI UKAS