MIRI: Pemansang infrastruktur menua pesisir enggau pengawa nyungkak tikas pengelantang rayat mengkang semampai dikemerat nyengkaum ba sitak Kunsil Negeri (DUN) Mulu ngambi ke enda tinggal ari pemansang baka ba mengeri.

Kaban Kunsil Negeri (ADUN) Mulu, Datuk Gerawat Gala maya nemuai ke Miri kena Hari Dua tu tadi udah ngulu pengawa betemu enggau agensi perintah enggau peribit nyengkaum Agensi Pemansang Tanah Tinggi (HDA) enggau Opis Kereja Raya (JKR) dikena matau pemujur projek pemansang di sitak nya.

“Aku ngemeratka perengka guna infrastruktur digaga ba kandang menua pesisir ngambi ke sida iya enda tinggal ari pemansang.

“Jalai alun, jematan, perengka guna mensia mayuh, semua tu besai reti dikena nyungkak pengelantang tikas pengidup rayat,” ku iya.

Iya madah munyi nya sepengudah betuaika Aum Matau Projek ti bela berandauka projek nyeleti jalai batang ari Long Jeeh ke Long Selawan, pemansang STOLport Bario enggau pengawa ngaga jematan ‘bailey’ meraka Sungai Baleh.

Kelimpah ari nya, Datuk Gerawat bisi betemu enggau pengari komuniti nyengkaum raban gereja mendingka peminta enggau penemu sida seraya ngenegap kerejasama tuai enggau rayat.–EDISI UKAS