BETONG: Peranak rumah panjai lebih agi ba kandang menua pesisir dilalau numbuhka bomba voluntia dikena napi penusah angus ke enda disadang nyadi.

Sapit Premier Sarawak, Datuk Amar Douglas Uggah Embas madah, penumbuh bomba voluntia nya diatu endang beguna endar, lebih agi ba kandang menua ke jauh ari Opis Bomba enggau Penyah Penusah.

"Apin lama tu tadi, kitai udah napi penusah ti nyadi ba sebuah kolej di Betong alai tim bomba voluntia mujur nyaup Opis Bomba enggau Penyah Penusah Malaysia madam api,” ku iya.

Iya madah munyi nya ngagai media ba pengerami nutup Program Nagang enggau Madam Api di Rumah Johnical Lanyau, Linsom ditu, kena Hari Dua tu tadi.

Program tu digulu Kaban Komiti Pemansang enggau Pengelikun Genturung Pendiau (JPKK), biro indu rumah panjai sereta pampang Parti Pesaka Bumiputera Bersatu (PBB) ari 22 buah rumah panjai sitak DUN Bukit Saban.

Ba pekara bekaul, Datuk Amar Douglas Uggah madah ke iya begulai enggau Kaban Parlimen Betong, Dato Dr. Richard Rapu deka berati chara pemadu engkeman dikena numbuhka mayuh agi bomba voluntia ba Bukit Saban ke bisi 94 buah rumah panjai.

Raban voluntia tu, ku iya, deka direjista nengah Opis Bomba enggau Penyah Penusah.

Chairman Komiti Pengatur Penusah Ngenyit Nengeri Sarawak (JPBNS) nya mega nerangka tim nya deka diberi perengka pengangkut ti engkeman, pam ai sereta hos, kelimpah diberi latih dikena bejalaika pengawa sida enggau mujur.-EDISI

#UKASnews