SARIKEI: Pengerami Ramah Tamah Aidilfitri ke diatur Unit Komunikasi Awam Sarawak (UKAS) richah enggau penatai agensi perintah di Sarikei, Hari Dua Tu tadi.

Direktor UKAS, Awang Putrayusrie Awang Redzuan madah, batang tuju pengerami nya endang dikena ngenegapka agi kaul strategik UKAS enggau agensi perintah nengeri ke bukai nyengkaum ba sitak Sarikei.

Ku iya, UKAS endang ransing nyukung pemansang nengeri pegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

“Sekeda inisiatif besai ti dikemerat ke perintah baka Ekonomi Digital, Kuasa Gadung, Pelajar, Latih Teknikal enggau Vokasional (TVET) sereta pemansang menua pesisir nengah Pelin Pemansang Udah COVID-19 (PCDS) 2030.

"Pengerami tu ukai semina makai serumpu, tang besai reti nyadi alai ngenegapka kerejasama sereta semengat gawa dalam siti tim ba orang kereja perintah nengeri,” ku iya.

Iya madah munyi nya ba teks jaku ti dibacha Pegawai Tadbir Khas UKAS, Datu Takun Sunggah.

Awang Putrayusrie mega madah, projek baka Jalai Besai Pan Borneo, perengka pengangkut moden enggau pemansang internet menua pesisir sebagi ari pengawa ke digaga enggau chara strategik dikena ngerapitka agi seraka pemansang mengeri enggau menua pesisir di Sarawak.

"UKAS ransing ngesan pengawa nyadi agensi ngatur komunikasyen strategik perintah, nentuka penerang ti dipadah betul sereta mai pemaik ngagai rayat nengah mayuh macham pelasar digital enggau chara lama,” ku iya.

Sama datai ngerichah pengerami nya, Residen Sitak Sarikei, Datu Michael Ronnie Langgong, Tuai Polis Pelilih Sarikei, Superintenden Aswandy Anis, Raban Tuai Opis Perintah enggau raban opis UKAS.-EDISI UKAS