KUALA LUMPUR: Yayasan Chow Kit mujur mandangka gerempung ukai dikuasa perintah (NGO) ulih nyaup ngintu pengelantang pengidup nembiak mit nyema pengawa nya digaga enggau manah.

Menteri Pemansang Indu, Nembiak Mit enggau Pengelantang Komuniti Sarawak (KPWK), Dato Sri Fatimah Abdullah madah, chara Yayasan Chow Kit nya ulih nyadi model pemadu manah dikena ngenegap pengawa ngintu pengelantang nembiak mit, nyengkaum sida ti nadai ngembuan dokumen peranak menua.

“Chara inklusif enggau holistik ti dikemeran ditu patut dititih.

“Kami meda pengulih besai ngena model baka tu di Sarawak, ngira guna enggau konteks menua,” ku iya maya penemuai nemuai ngagai palan pengintu pengelantang nya ditu, Hari Dua tu tadi.

Penatai iya maya nya ti disambut Penengkebang Yayasan Chow Kit, Dato’ Dr. Hartini Zainuddin bela bekunsi senentang juluk ati enggau pengawa sida nyaup pengelantang, pelajar enggau pemansang nembiak mit ti enda dikeibuh.

Kelimpah ari nya, iya mega bisi nemuai ngagai One Stop Children Centre, begunan empat ringkat ke agi benung diseruri kenyau 14 Mac 2022 lalu disadang tembu kena 21 Jun 2025.

Projek nya nyengkaum lapan bilik kelas, dua buding, bilik berubat, bilik sembiang, gimnasium sereta kebun atas atap.

Penemuai nya meri awak nengkebang kerejasama Perintah Sarawak enggau NGO baka Yayasan Chow Kit, ba pengawa ngerembaika pengawa ngintu rama sereta ngenegap sistem sukung nyaup nembiak mit selampur menua.

Sama datai maya nya, Sapit Menteri KPWK Datuk Rosey Yunus, Sekretari Mendam KPWK Datu Felicia Tan Ya Hua, Sapit Sekretari Mendam KPWK Nur Alina Abdullah @ Colliner Gohe enggau Sekretari Eksekutif Kaunsil Pemansang Rama Sarawak Riziandy Nawawi.-EDISI UKAS