DEBAK: Kaban Parlimen Betong, Dato Dr. Richard Rapu udah ngemendarka projek ngaga jalai ngelawa sungai enggi rumah panjai Lakis Entawa ditu ngena Projek Mesra Rakyat (PMR).

Projek ke diatur Opis Pemansang Nengeri Sarawak (Zon Sri Aman) nya beungkus RM50,000 digaga dalam kandang 16 minggu.

Pengawa nyua taba projek udah diatur ba Rumah Jumat Bakit apin lama tu tadi ke dikemataka Dato Dr. Richard empu, begulai enggau pengari agensi ngatur projek, kontraktor sereta peranak rumah panjai.

Bejaku maya nya, Dato Dr. Richard ngarap projek ulih lengkas belabuh digaga lalu tembu sebedau Gawai Dayak tu ila.

“Perintah endang ransing nyikap menua pesisir enggau perengka guna ti patut. Aku ngarapka projek tu mujur sereta meri pemaik ngagai rayat ditu," ku iya.

Bela datai maya nya Penulung Injinir Sivil Opis Pemansang Sarawak (Zon Sri Aman) Shamhimi Jotem, Pegawai UKAS Sitak Betong Tony Malang Chabu, Pegawai Khas Kaban Parlimen Betong Alister Awan, Tuai Rumah Panjai Entawa Jumat Bakit enggau Menijar Saujana Hasnah Enterprise. -EDISI UKAS