SEMOP: Pemayuh projek besai dikemendarka digaga ninting taun lebih agi di menua pesisir nejuka tanggungpengawa agensi bekaul bela nambah ti ngujungka bisi sekeda projek napi penanggul laun.
Sapit Menteri Ba Opis Premier Sarawak (Pekara Korporat, Pemadah Enggau UKAS) Datuk Abdullah Saidol madah, tu bela ngayanka pengeransing Perintah Gabungan Parti Sarawak (GPS) pegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngemansangka menua pesisir.
“Bisi projek napi penanggul laban tanggungpengawa agensi bekaul mega majak nambah bepun ari peminta bala pengari rayat GPS digagaka projek besai, dikemendarka perintah ti semampai betambah ninting taun lebih agi di menua pesisir.
“Bala pegawai agensi sekalika ba renggat pelilih tauka sitak meseti datai ngabas projek ba selampur menua ti bela ngenataika penanggul bukai lebih agi di menua pesisir," ku iya maya Program Ramah Tamah Hari Raya DUN N.42 Semop ti diatur Palan Servis DUN N.42 ditu, Hari Minggu tu tadi.
Ku Datuk Abdullah nerang, iya semampai ditanya bala tuai komuniti enggau rayat mayuh bekaul status projek nyengkaum projek sistem entali ai ke beguna endar maya musim ujan.
“Aku nemu agensi baka JKR, DID enggau JBALB benung napi penguji besai bepun ari peminta projek majak nambah nyengkaum projek ke udah dikemendar digaga pengari rayat GPS.
“Kelimpah ari nya, pemesai bungkur menua di Sarawak bela meri penanggul ngagai sida," ku iya madah baru.
Iya ke mega Kaban Kunsil Nengeri (ADUN) Semop madah, agensi perintah diatu chakah nambah pemayuh pegawai teknikal sida ba renggat pelilih enggau sitak menua ngambika ulih ngerumban penembu projek.
Ba pekara bekaul, Datuk Abdullah madah, bisi 11 iti projek udah dipinta ungkup Pulau Bruit ti deka ngena belanja manggai RM90 juta.
Ba endur bukai pegai sitak DUN Semop, bisi tujuh iti projek besai ke beungkus urung RM296 juta bela deka digaga alai semua projek nya udah dikemendarka taun siti tadi.
Ba pekara bukai, Datuk Abdullah bela madah ke diri enda lantang ati meda pengelaun projek Jematan Batang Paloh tembu alai rayat di Pulau bruit endang andal jematan nya ulih ditengah Hari Raya taun tu.
Ku iya, iya enggau Sapit Premier Sarawak, Datuk Amar Douglas Uggah Embas empu udah datai ngabas projek nya lalu ngelalau kontraktor ngerumban nembuka pengawa sida.
Program Ramah Tamah Hari Raya DUN N.42 Semop ti diatur Palan Servis DUN N.42 Semop ba 18 bengkah endur nya berengkah 11 April tu tadi.
Program ninting taun tu ukai semina nyadi pelasar ngerapitka kaul tuai enggau komuniti tang mega nyadi palan ngenataika penerang pemansang ke benung sereta deka digaga ba kandang menua nya. - EDISI UKAS
