PAKAN: Komiti Pemansang enggau Pengelikun Genturung Pendiau (JKKK), Gerempung Tuai Rumah enggau Biro Indu rumah panjai dilalau chakah agi ngatur program randau enggau pangan diri dikena nentuka penanggul ke bisi nyadi deka diputar nengah chara kolektif.

Kaban Kunsil Nengeri (ADUN) Pakan, Tan Sri Dato Sri William Mawan Ikom madah, chara baka tu ulih ngenegap ulah rindu begempung seraya ngenataika penemu rayat ngambika ulih diperati.

Ku iya, pengawa berandau enggau ngadu langgur pemansang nyadi pemun ngagai pemujur pemansang lebih agi di menua pesisir baka di Pakan.

Iya madah munyi nya maya Program Randau Begulai Enggau Mensia Mayuh ti diatur JKKK Rumah Morris ditu, apin lama tu tadi.

Ba pengawa nya, Tan Sri Dato Sri William bela ngabas projek udah tembu digaga nengah Program Transformasyen Menua Pesisir (RTP) iya nya projek ngadu tebiang ba mua Rumah Morris.

Projek beungkus RM50,000 nya tembu ujung taun siti tadi ti digaga dikena nyeliah penusah tanah tusur ke sebedau tu nanggul kebun lada peranak rumah panjai nya.

Pengawa maya nya bela digulu Tuai Genturung Pendiau enggau Raban bansa (KMKK), Raban Tuai Rumah, Biro Indu sereta peranak menua semak dia. -EDISI UKAS