KUCHING: Projek Bekal Karan lebih agi di Ulu Poi enggau Ulu Machan, Kanowit benung digaga ngena Skim Bekal Karan Menua Pesisir (RES) Last Miles Renggat 2 enggau 3 ke disadang tembu ujung taun tu.

Sapit Menteri Utilti enggau Telekomunikesyen Datuk Dr Abdul Rahman Junaidi madah, bisi tujuh iti projek udah tembu ba Ulu Poi enggau lima iti agi projek benung digaga.

Ku iya, projek nya deka mai pengelantang ngagai 234 ruang bilik ila.

"Ba Ulu Machan, 11 iti projek RES Last Miles udah digaga.

"Ari nya, lapan iti udah tembu lalu tiga iti agi benung digaga.

"Projek tu deka dikena 189 ruang bilik," ku iya madah.

Iya nerangka pekara nya maya nimbal tanya Kaban Kunsil Nengeri (ADUN) Machan, Allah Siden Gramong ba Aum Kunsil Nengeri (DUN) Ke-19, Hari Lima.

Iya mega madah, ba projek Skim Alternatif Karan Menua Pesisir Sarawak (SARES) semina siti aja projek udah tembu iya di Machan ba Rumah Langit Angol, Nanga Bilat, Sungai Poi.

Ba Projek ALAF tauka Skim Dana Pemohon Tambahan tauka Lewat, ku iya, naka ke diatu bisi 51 buah rumah panjai enggau premis udah ditentu digagaka projek nya.

Ari semua nya ku iya, 14 projek ALAF udah tembu lalu 37 ke bukai benung ba renggat survey enggau ngaga pelin. -EDISI UKAS